Қозоғистон ва Ўзбекистон қишда Қирғизистонга электр етказиб беради

 

Олмаотада Ўзбекистон, Қозоғистон ва Қирғизистоннинг энергетика ҳамда сув хўжалиги идоралари раҳбарлари иштирокида уч томонлама музокаралар бўлиб ўтди. Унда сув-энергетика соҳасидаги ўзаро ҳамкорликнинг янги параметрлари, куз-қиш мавсумида бир-бирини қўллаб-қувватлаш механизмлари ва келгуси вегатация даври учун тайёргарлик масалалари муҳокама қилинди.

 

Музокаралар якунига кўра, Қозоғистон ва Ўзбекистон куз-қиш мавсумида Қирғизистонга электр энергиясини етказиб беришга тайёрлигини билдирди. Бу чора Қирғизистоннинг қишки даврда электр ишлаб чиқаришни қисқартириши ва Тўхтагул сув омборида зарур сув захирасини шакллантиришга ёрдам беради.

 

Тўпланган сув ҳажми 2026 йилги вегатация мавсумида Қозоғистон ва Ўзбекистоннинг жанубий ҳудудларидаги қишлоқ хўжалиги майдонларини барқарор суғориш учун йўналтирилади.

 

Шунингдек, уч давлат энергия истеъмолини оптималлаштириш, тежаш бўйича қўшма чоралар кўриш ва минтақада энергетика барқарорлигини мустаҳкамлашга алоҳида эътибор қаратди. Томонлар ҳамкорлик ишларининг яхши қўшничилик руҳида олиб борилаётганини қайд этди.

 

Ўзбекистон музокараларда энергетика тизимининг транзит, етказиб бериш ва баланслаш учун зарур техник шароитларни таъминлашга тайёрлигини тасдиқлади.

 

Йиғилиш якунида 2026 йил вегатация мавсумига тайёргарлик доирасида қишки электр энергияси етказиб бериш ва сув захиралаш ҳажмларини белгиловчи уч томонлама баённома имзоланди.

 

Аввалроқ Ўзбекистон ва Афғонистон расмийлари 2026 йилда электр энергиясини етказиб бериш учун шартнома имзолаган эди.