Ўзбекистон, Қирғизистон, Тожикистон президентларига Лев Толстой номидаги халқаро тинчлик мукофоти берилди
Уч давлат раҳбари Марказий Осиёда тинчлик ва хавфсизликни мустаҳкамлашдаги ҳиссаси учун тақдирланди.
Ўзбекистон Президенти Шавкат Мирзиёев, Тожикистон Президенти Имомали Раҳмон ва Қирғизистон Президенти Садир Жапаров Лев Толстой номидаги тинчлик мукофоти билан тақдирланди.
Мукофот уч давлат раҳбарининг Марказий Осиё минтақасида тинчлик, хавфсизлик ва ўзаро ишонч муҳитини мустаҳкамлашга қўшган салмоқли шахсий ҳиссаси учун берилди. Тақдирлаш маросимида мукофот ҳайъати раиси, машҳур дирижёр Валерий Гергьев давлат раҳбарларига мукофот медалларини топширди.
Лев Толстой номидаги тинчлик мукофоти Россия Тарих жамияти ҳамда Россия Тинчлик фонди томонидан таъсис этилган бўлиб, у урушларнинг олдини олиш, зўравонликсиз ва кўпқутбли дунёни барпо этиш ҳамда тинчликни мустаҳкамлаш йўлидаги алоҳида хизматлар учун берилади.
Айни пайтда Ўзбекистон Президенти Шавкат Мирзиёев амалий ташриф билан Россиянинг Санкт-Петербург шаҳрида бўлиб турибди. Ташриф доирасида у 21–22 декабрь кунлари Евроосиё Олий иқтисодий кенгашининг навбатдаги мажлисида кузатувчи мақомида, шунингдек, Мустақил Давлатлар Ҳамдўстлиги давлат раҳбарларининг норасмий учрашувида иштирок этади.
