Мирзиёев Саудия Арабистони элчисини “Дўстлик” ордени билан мукофотлади
Саудия Арабистонининг етакчи компаниялари билан Ўзбекистон ўртасидаги лойиҳалар портфели 27 миллиард АҚШ доллардан ошди.
29 декабрь куни Президент Шавкат Мирзиёев Ўзбекистонда дипломатик вазифасини якунлаётган Саудия Арабистони Подшоҳлигининг Фавқулодда ва мухтор элчиси Юсуф ал-Утайбийни “Дўстлик” ордени билан тақдирлади. Бу ҳақда президент матбуот хизмати хабар қилди.
Мирзиёев элчининг Ўзбекистон билан Саудия Арабистони ўртасидаги ҳар томонлама шериклик муносабатларини ривожлантириш ва мустаҳкамлашга қўшган шахсий ҳиссасини алоҳида таъкидлади.
“Турли даражаларда тизимли мулоқот ва фаол алоқалар йўлга қўйилгани мамнуният билан қайд этилди. Товар айирбошлаш, тўғридан-тўғри инвестициялар ҳажми ва қўшма корхоналар сони жадал ўсиб бормоқда. Саудия Арабистонининг етакчи компаниялари билан лойиҳалар портфели 27 миллиард доллардан ошди”, — дейилади хабарда.
Шунингдек, давлат раҳбари Саудия Арабистони Ҳукуматига Ўзбекистон фуқароларининг Ҳаж ва Умра амалларини адо этишига яратилган қулай шароитлар учун миннатдорлик билдирди.
Учрашув якунида Ўзбекистон Президенти Юсуф ал-Утайбийга Ўзбекистон – Саудия дўстлик ва кўп томонлама шериклик муносабатларини мустаҳкамлашга қўшган катта ҳиссаси учун “Дўстлик” орденини топширди.
Элчи унинг дипломатик миссиясига берилган юксак баҳо ҳамда Ўзбекистон ва Саудия Арабистони ўртасида кенг кўламли ҳамкорлик ривожини ҳар томонлама қўллаб-қувватлаётгани учун мамлакат раҳбарига миннатдорлик билдирди.
