Шавкат Мирзиёев Владимир Путиннинг қароргоҳига қилинган ҳужумни қатъий қоралади
Ўзбекистон ва Россия Президентлари телефон орқали мулоқот қилдилар.
30 декабрь куни Ўзбекистон Республикаси Президенти Шавкат Мирзиёев ва Россия Федерацияси Президенти Владимир Путиннинг телефон орқали мулоқоти бўлиб ўтди.
Суҳбат аввалида давлат раҳбари Россия Президентининг Нижний Новгород вилоятидаги қароргоҳига ҳужум қилишга уринишни қатъий қоралади.
Бундай хатти-ҳаракатлар барқарорлик ва хавфсизликка, шу жумладан узоқ муддатли тинчликка эришишга қаратилган саъй-ҳаракатларга таҳдид солиши таъкидланди.
Олий даражадаги келишувларни амалга ошириш нуқтайи назаридан Ўзбекистон-Россия стратегик шериклик ва иттифоқчилик муносабатларини янада ривожлантириш масалалари кўриб чиқилди.
Халқаро ва минтақавий аҳамиятга молик долзарб масалалар юзасидан ҳам фикр алмашилди, бўлажак тадбирлар режаси муҳокама қилинди.
Суҳбат якунида етакчилар кириб келаётган янги – 2026 йил муносабати билан бир-бирини самимий қутлаб, мустаҳкам соғлик, бахт-саодат ва фаровонлик, икки мамлакатнинг биродар халқларига эса тинчлик-осойишталик ва бардавом равнақ тиладилар.
Эслатиб ўтамиз, аввалроқ Россиянинг шимол-ғарбида жойлашган Новогород вилоятида жойлашган Путин қароргоҳига 91 та дрон орқали ҳужум қилингани ҳақида хабар берилган эди. Рус ҳукумати расмийларининг айтишича, ҳужумни Украина қилган, бироқ Украина президенти Владимир Зеленский бу ҳужумни Украина қилмаганини айтди. Таҳлилчилар фикрича, бу ҳужум шундоқ ҳам Украина-Россия ўртасидаги ҳал қилинмаётган урушни янада чигаллаштириши мумкин.
