Россияда бир ой аввал ўлдирилган ўзбекистонлик мигрантнинг жасади бугун қайтарилмоқда
У 2025 йилнинг декабрь ойида ОМОН ходимлари томонидан куч ишлатилиши оқибатида вафот этгани хабар қилинганди.
Аввалроқ Россияда Самарқанддан бўлган меҳнат муҳожири кучишлатар тизим ходимлари томонидан амалга оширилган қийноқ оқибатида вафот этгани ҳақида хабар берилганди.
Воқеа 2025 илнинг 12 декабрь кунида юз берган бўлсада, бу ҳақида хабарлар январь бошида сиздирилганди. Бундан англашиладики, мигрантнинг жасади Россияда салкам бир ой давомида қолиб кетган.
Ташқи ишлар вазирлиги матбуот котиби Аҳрор Бурхоновнинг Zamon.uz'гa маълум қилишича, марҳумнинг жасади ҳамон Россия Федерациясида сақланмоқда. Бугун, 11 январь куни у Ўзбекистонга юборилади.
“Якшанба куни маййит Ўзбекистонга юборилади. Душанба куни Ўзбекистон вакиллари самарқандлик фуқаронинг вафоти бўйича Хабаровск расмийлари билан учрашади”, дейди Бурхонов.
Қўшимча қилинишича, жасадни ватанга қайтарилиши билан боғлиқ харажатлар учун махсус фонд ташкил қилинган. Агар марҳумнинг яқинлари харажатларни тўлаш бўйича қийинчиликка дуч келса, бу давлат тарафидан қопланади.
Эслатиб ўтамиз, 2025 йилнинг 12 декабрь куни Россиянинг Хабаровск шаҳрида ОМОН ходимлари кафелардан бирига бостириб кириб, у ерда бўлган ўзбекистонлик фуқароларга нисбатан куч ишлатган. Оқибатда икки нафар фуқаро оғир тан жароҳатлари олиб, кома ҳолатига тушган, улардан бири, бир неча кун ўтиб вафот этган. Иккинчи жабрланувчи ҳақидаги маълумотлар эса расман тасдиқланмаган.
