“Бу бизнинг хавфсизлигимиз учун муҳим” — Абдулазиз Комилов
Президент маслаҳатчиси Ўзбекистоннинг Тинчлик кенгашига қўшилиш сабабларини изоҳлади.
Президент маслаҳатчиси, Ўзбекистоннинг собиқ ташқи ишлар вазири Абдулазиз Комилов мамлакатнинг Тинчлик кенгаши таркибига қўшилиш сабаблари ва ундан кўзланган манфаатлар ҳақида изоҳ берди.
Унинг айтишича, Ўзбекистон 22 январь куни қатор давлатлар билан биргаликда Яқин Шарқда тинчликни мустаҳкамлаш ва Ғазо секторидаги инқирозни ҳал этишга қаратилган мазкур халқаро ташаббусни қўллаб-қувватлаган. Комилов бу қарор бир нечта муҳим омиллар билан боғлиқлигини таъкидлади.
“Аввало, бу масала хавфсизлик билан бевосита боғлиқ. Яқин Шарқдаги беқарорлик Марказий Осиё, жумладан Ўзбекистон хавфсизлигига ҳам таъсир кўрсатиши мумкин. Иккинчидан, кенгаш олдига қўйилган вазифалар ва мақсадлар Ўзбекистон ташқи сиёсатининг асосий тамойилларига тўлиқ мос келади. Учинчидан эса, ушбу минтақада бизнинг жиддий ва ҳаётий манфаатларимиз мавжуд”, деди Абдулазиз Комилов “Ўзбекистон 24” телеканалига берган интервьюсида.
Президент маслаҳатчиси давлат раҳбари Шавкат Мирзиёев Яқин Шарқдаги жараёнларга доимий ва катта эътибор қаратиб келаётганини қайд этди. У бир неча йил аввал айрим Ўзбекистон фуқаролари Яқин Шарққа бориб, экстремистик оқимларга қўшилгани, кейинчалик эса давлат томонидан улар ватанга қайтарилиб, ижтимоий ҳаётга мослаштирилганини эслатди.
“Бу борадаги инсонпарварлик сиёсати БМТ раҳбарияти томонидан юқори баҳоланган. Президентимиз юритаётган сиёсат халқаро миқёсда намуна сифатида эътироф этилган. Шу сабабли биз учун минтақавий хавфсизлик масаласи устувор аҳамиятга эга”, деди Комилов.
У, шунингдек, Афғонистон мисолида Яқин Шарқдаги можароларнинг Марказий Осиёга қандай салбий таъсир кўрсатишини таъкидлади. Унинг сўзларига кўра, урушлар бошланганидан кейин террористик ва экстремистик гуруҳлар айнан Яқин Шарқдан Афғонистонга кириб келган.
Комилов Яқин Шарқ муаммоларини ҳал этиш осон эмаслигини, бунинг учун кенг халқаро ҳамкорлик зарурлигини қайд этди. Унинг фикрича, АҚШ, араб ва мусулмон давлатлари, шунингдек Марказий Осиё мамлакатлари биргаликда ҳаракат қилган тақдирдагина барқарор тинчликка эришиш мумкин.
Маълумот ўрнида, 22 январь куни Швейцариянинг Давос шаҳрида Тинчлик кенгаши низоми имзоланган. Ушбу тузилма БМТ Хавфсизлик Кенгаши резолюцияси билан қўллаб-қувватланган Ғазо можаросини тугатиш бўйича комплекс режани амалга ошириш доирасида ташкил этилган. Абдулазиз Комилов Ўзбекистоннинг мазкур кенгашдаги иштирокини мамлакатга билдирилган ишонч ва халқаро майдондаги нуфузининг эътирофи сифатида баҳолади.
