Эндиликда Ўзбекистонда университетга киришда B1 даражали сертификатга ҳам имтиёз берилади
Чет тили 1-фан сифатида белгиланган йўналишларга Б1 даражадаги сертификат асосида қабул амалга оширилади.
Ҳукуматнинг тегишли қарори билан айрим норматив-ҳуқуқий ҳужжатларга ўзгартириш ва қўшимчалар киритилди. Бу ҳақда Адлия вазирлиги хабар берди.
Унга кўра, фанлар мажмуасида чет тили 1-фан сифатида белгиланган таълим йўналишларига қабул эндиликда чет тилини билиш бўйича камида B1 даражадаги миллий ёки халқаро тан олинган сертификат асосида амалга оширилади.
Шунингдек, фанлар мажмуасида чет тили мавжуд бўлган таълим йўналишларига қабул жараёнида сертификатга эга абитуриентларга қуйидаги тартибда балл берилади:
- B1 даражадаги миллий ёки халқаро сертификатга эга абитуриентларга ушбу фандан белгиланган максимал баллнинг 75 фоизи миқдорида балл берилади;
- B2 ва ундан юқори даражадаги миллий ёки халқаро сертификатга эга абитуриентларга ушбу фандан белгиланган тўлиқ максимал балл берилади.
Маълумот учун, илгари мазкур таълим йўналишларига қабул фақат камида Б2 даражадаги миллий ёки халқаро сертификат асосида амалга оширилган.
