Ўзбекистондаги мактабларда қоғоз кундалик ва журналлар жорий этилиши рад этилди
Мактабларда ўқувчиларнинг давомати ва баҳолари эМактаб электрон тизими орқали юритилмоқда.
Ижтимоий тармоқларда Ўзбекистондаги умумтаълим мактабларида анъанавий (қоғоз) кундаликлар ва синф журналлари қайта жорий этилаётгани ҳақида хабарлар тарқалмоқда. Мазкур маълумотлар ҳуқуқий асосга эга эмас.
Мактабгача ва мактаб таълими вазирлиги маълум қилишича, давлат раҳбарининг 2018 йил 5 сентябрдаги 3931-сонли қарори ҳамда 2019 йил 29 апрелдаги 5712-сонли Фармонига мувофиқ, ҳозирги кунда мамлакатдаги барча умумтаълим мактабларида ўқувчиларнинг давомати ва фанлар бўйича ўзлаштириш кўрсаткичлари eMaktab электрон журнал тизими орқали юритиб келинмоқда.
Мазкур тизимни жорий этишдан мақсад — педагогларнинг иш юкламасини камайтириш, ўқув жараёнини ташкил этишда замонавий ахборот-коммуникация технологияларини кенг жорий этишдан иборат. Бу тажриба халқаро амалиётда ҳам ўз самарадорлигини исботлаган.
Электрон журнал тизими орқали ота-оналар фарзандларининг таълим жараёни ва баҳоларини масофавий тарзда кузатиш имкониятига эга бўлиб, баҳолашда шаффофлик таъминланмоқда. Шунингдек, педагоглар фаолиятидаги турли қогозбозликлар сезиларли даражада қисқартирилган.
Шу муносабат билан, Мактабгача ва мактаб таълими вазирлиги томонидан мактабларда анъанавий кундаликлар ва синф журналларига қайтиш бўйича ҳеч қандай топшириқ берилмагани, мамлакатда амалга оширилаётган рақамлаштириш жараёнлари ортга қайтмас тус олгани алоҳида таъкидланади.
