Тошкентдаги боғчаларда карантин жорий қилинадими?
Ижтимоий тармоқларда пойтахтдаги боғчаларда карантин жорий этилиши мумкинлиги ҳақида хабарларга ойдинлик киритилди.
Ижтимоий тармоқларда айрим мактабгача таълим ташкилотларида карантин жорий этилиши мумкинлиги ҳақида турли хабарлар тарқалди. Мазкур ҳолат юзасидан Санитария-эпидемиология қўмитаси Тошкент шаҳар бошқармаси расмий изоҳ берди.
Маълум қилинишича, ҳозирги кунда шаҳар ҳудудида карантин чораларини жорий этишни талаб қиладиган хавфли юқумли касалликлар бўйича кескин эпидемиологик вазият кузатилмаяпти. Мутахассислар томонидан қизамиқ, менингит, гепатит, сил ва бошқа инфекцион касалликлар бўйича мониторинг доимий равишда олиб борилмоқда ва мавжуд ҳолатлар карантин эълон қилиш даражасида эмас.
Мутахассислар таъкидлашича, қиш мавсумида грипп ва ўткир респиратор вирусли инфекциялар билан касалланиш ҳолатларининг мавсумий кўпайиши табиий жараён ҳисобланади. Шу сабабли мактабгача таълим ташкилотларида болалар саломатлигини ҳимоя қилиш мақсадида эрталабки фильтр жараёнлари, тана ҳароратини ўлчаш, касаллик аломатлари мавжуд болаларни вақтинча ажратиш ва ота-оналарга профилактик тавсиялар бериш ишлари олиб борилмоқда.
Мазкур профилактик чоралар айрим фуқаролар томонидан нотўғри талқин қилиниб, «карантин» сифатида баҳоланмоқда. Шу муносабат билан фуқаролардан тасдиқланмаган ахборотларга ишонмаслик, фақат расмий манбаларда эълон қилинадиган маълумотларга таяниш сўралади.
