Истанбулда Дурдона Ҳакимованинг дугонаси ҳам ўлдирилиб, жасади бўлакларга бўлингани маълум бўлди
Аввалроқ чиқинди қутисидан ўзбекистонлик Дурдона Ҳакимованинг бошсиз жасади топилгани, унинг хонадоши эса ўша кундан бери бедарак ёқолгани хабар қилинган эди.
Жорий йил январ ойида Туркияда ўзбекистонлик аёлнинг ваҳшийларча ўлдирилиши жамоатчилик орасида кенг муҳокамаларга сабаб бўлган эди.
Қотиллик 24 январ куни Истанбул шаҳрида содир бўлган. Шаҳарнинг Шишли тумани Ферикўй маҳалласидаги чиқинди контейнеридан бошсиз тана топилган. Кейинчалик ушбу жасад Ўзбекистон фуқароси, 37 ёшли Дурдона Ҳакимовага тегишли экани аниқланган.
Тергов жараёнида ҳуқуқ-тартибот органлари яна бир қурбон мавжудлигини аниқлади. Маълум қилинишича, Умрание туманидаги уйда яна бир аёл ўлдирилгани аниқланган. У марҳума Дурдона Ҳакимованинг бирга яшаб келган шериги, 32 ёшли Сайёра Эргашалиева бўлиб, 23 январдан буён бедарак йўқолган сифатида қидирувда бўлган.
Терговчилар фикрига кўра, у биринчи бўлиб ўлдирилган бўлиши мумкин. Шундан сўнг иккинчи қурбон ўлдирилган деган тахмин илгари сурилмоқда.
Полиция гумонланувчилар яшаган уй атрофидаги кузатув камераларини ўрганган. Видеоёзувларда турли кунларда қора пакетлар уй ташқарисига олиб чиқилгани, шунингдек оқ чамадон олиб чиқилиб, чиқинди контейнерига ташлаб кетилгани акс этган.
Ҳозирда мазкур жиноятлар ўзаро боғлиқ ёки боғлиқ эмаслиги юзасидан тергов ишлари давом эттирилмоқда.
