Тошкент кўчаларига яна панжаралар ўрнатилиши ортидан шаҳар ҳокимига депутатлик сўрови юборилди
Депутат ушбу долзарб ижтимоий масала бўйича асослантирилган тушунтириш беришни сўраяпти.
Ўзбекистон Халқ демократик партияси депутати Анвархон Темиров пойтахт йўллари ўртасига янги панжаралар қайта ўрнатилгани юзасидан шаҳар ҳокими Шавкат Умурзоқовга депутатлик сўрови юборди.
Унинг ёзишича, ҳокимнинг 2025 йил 20 майдаги, шунингдек, 2025 йил 21 июлдаги қарорларига мувофиқ, Тошкент шаҳрида кўча ва йўллар бўйлаб темир панжараларни ўрнатиш учун жами 8,4 млрд маблағ ажратиш кўзда тутилгани, шу асосда амалга оширилаётган ишлар алоҳида муҳокамаларга сабаб бўлган.
Эски амалиётга қайтилиб, пойтахт кўчаларида янги панжаралар ўрнатилгани, кейин олиб ташлангани кенг жамоатчиликда, жумладан, Халқ демократик партияси электорати орасида ҳақли эътирозлар, қатор муҳим саволларни келтириб чиқарган.
“Юқоридагиларга асосан Олий Мажлис Қонунчилик палатасидаги ЎзХДП фракцияси аъзоси Анвархон Темиров Тошкент шаҳар ҳокими Шавкат Умурзоқовга депутатлик сўрови юборди”, дейилади хабарда.
Унда жамоатчилик ва партия электоратини безовта қилаётган саволлар кўтарилган.
Хусусан, Тошкент шаҳри кўча ва йўлларида йўналишларни ажратувчи темир панжаралар ўрнатилиши ҳаракат хавфсизлигини таъминлашга, пиёдалар билан боғлиқ йўл-транспорт ҳодисаларининг олдини олишга хизмат қилиши қандай асосланган?
Темир панжаралар ва бошқа тўсиқлар ўрнатиш масаласида экспертлар билан маслаҳатлашувлар ўтказилганми, уларнинг фикрлари олинганми? Бу борада илмий асосланган ва таҳлилий маълумотлар мавжудми?
Нима сабабдан яна бошқатдан кўплаб давлат маблағлари сарфланиб, пиёдалар ва йўловчиларга хавф туғдириши тан олинган амалиётга – йўналишларни ажратувчи темир панжараларни ўрнатишга қайтилмоқда?
Аҳоли зич жойлашган ва кўп ҳаракатланадиган кўчаларда пиёдалар осон ва тез кесиб ўтишини таъминлаш, пиёдалар ўтиш жойларини ташкил этиш бўйича қандай ишлар амалга оширилмоқда?
Ҳозир ўрнатилаётган панжара тўсиқлар қайси норматив-ҳуқуқий асос ва стандартлар бўйича лойиҳаланган ва амалга оширилмоқда? Бу каби темир панжараларни ўрнатиш йўлларда пиёдалар ва йўловчилар хавфсизлигини кафолатлайдими?
Депутатлик сўровида “Парламент назорати тўғрисида”ги Қонуннинг 15-моддасига мувофиқ, юзага келган саволларга жавоб берган ҳолда, ушбу долзарб ижтимоий масала бўйича асослантирилган тушунтириш бериш ёки нуқтайи назарни баён этиш сўралган.
