Қозоғистонда йўлда қолган автобусдан ўзбекистонликлар эвакуация қилинди
Қутқарувчилар қирғиз, қозоқ ва ўзбекистонлик 13 нафар йўловчини иситиш пунктига жойлаштириб, уларга зарур ёрдам кўрсатган.
Қозоғистон ҳудудидан ўтувчи Остона–Петропавловск автомагистралида двигатель носозлиги сабабли фавқулодда тўхтаб қолган шаҳарлараро автобус йўловчилари қутқарув хизматлари томонидан хавфсиз жойга эвакуация қилинган.
Маълум қилинишича, Петропавловск шаҳридан Чимкент йўналишида ҳаракатланган автобус Макинск шаҳри ҳамда Макинка қишлоғи (Ақмола вилояти) оралиғида техник носозлик туфайли йўлда қолиб кетган. Автобус салонида жами 13 нафар йўловчи бўлиб, улар орасида 3 нафар Ўзбекистон фуқароси, 7 нафар Қирғизистон фуқароси ва 3 нафар Қозоғистон фуқароси бўлган.
Ҳодиса юзасидан Қозоғистон Фавқулодда вазиятлар вазирлиги қутқарувчилари ҳамда ҳуқуқни муҳофаза қилувчи органлар тезкор равишда воқеа жойига етиб бориб, барча йўловчиларни хавфсиз тарзда эвакуация қилган. Йўловчилар Макинск шаҳридаги иситиш пунктига жойлаштирилиб, уларга зарур ёрдам кўрсатилди ҳамда иссиқлик билан таъминланган.
