Тўқаев Трамп номи билан махсус мукофот таъсис этишни таклиф қилди
Таклиф қилинган мукофот АҚШ президентининг тинчликни таъминлашдаги ютуқларини эътироф этишга қаратилган.
Қозоғистон Президенти Қосим-Жомарт Тўқаев 19 февраль куни Вашингтонда бўлиб ўтган Тинчлик Кенгашининг биринчи йиғилишида нутқ сўзлади. Давлат раҳбари Яқин Шарқда барқарор ривожланиш минтақада тинчликни таъминлаш, ҳамкорликни кенгайтириш ва ишончни мустаҳкамлашга қаратилган янги механизмларни талаб қилишини таъкидлади. Бу ҳақда Тенгриневс хабар берди.
Тўқаев Қозоғистоннинг амалий ёрдам кўрсатишга, жумладан, мамлакатда турли даража ва форматларда учрашувлар ўтказишга тайёрлигини тасдиқлади.
Давлат раҳбари нутқида Тинчлик Кенгаши доирасида янги мукофот таъсис этишни таклиф қилди:
“Шунингдек, мен Президент Трампнинг тинчликни таъминлашдаги улкан ютуқларини эътироф этиш мақсадида Тинчлик Кенгаши ҳомийлигида унинг номи билан аталган махсус мукофотни таъсис этишни таклиф қилмоқчиман. Ишончим комилки, сизнинг кучли ва узоқни кўра оладиган раҳбарлигингиз остида Кенгаш ўзининг эзгу вазифасини муваффақиятли бажаради”, — дея хулоса қилди Қозоғистон президенти.
