АҚШ Олий суди Трампнинг айрим тарифларини ноқонуний деб топди

 

АҚШ Олий суди Доналд Трампнинг импорт товарларига божлар жорий этиш ваколатини ортиқча ишлатганини билдириб, айрим тарифларни ноқонуний деб топган. Суд қарори 6-3 овоз билан қабул қилинган. Уч либерал судья — Кетанжи Браун Жексон, Элена Каган, Сониа Сотомаёр — ва уч консерватив судья — Эми Кони Барретт, Нил Горсуч, Жон Робертс — тарифларни бекор қилишга овоз берган. Судьялар Бретт Каванаугҳ, Самуэл Алито, Кларенс Томас қарши чиққан. Бу ҳақда ББС хабар берди.

 

Суд қарорида Трамп миллий фавқулодда вазиятлар тўғрисидаги қонунга таянган ҳолда катта тарифларни жорий этиш орқали ўз ваколатларини ошириб юборганлиги қайд этилган. Олий суд шунингдек, Халқаро фавқулодда иқтисодий ваколатлар тўғрисидаги қонунга биноан президентга барча мамлакатлардан тариф жорий этиш ваколати берилмаслигини белгилаган.

 

Қарор эълон қилинганидан сўнг, Трамп норозилигини билдирган ва барча мамлакатлар импортига 10 фоиз глобал бож жорий этиш тўғрисида фармон имзолаган. Президентнинг сўзларига кўра, 1974 йилги Савдо тўғрисидаги қонуннинг 122-бўлими унга Конгресс розилигисиз барча мамлакатлардан импорт қилинадиган товарларга 150 кунгача 15 фоизгача божлар жорий этиш имконини беради.

 

АҚШ Молия вазири Скотт Бессентнинг маълум қилишича, Олий суд президентнинг таъсирини айрим жиҳатларда чеклаган бўлсада, у глобал тарифларни жорий этиш ваколатини сақлаб қолган.

 

Трамп шунингдек, суд томонидан бекор қилинган тарифлар бўйича компанияларга компенсация тўлашни режалаштирмаётгани ва бу масала ҳали Олий суд томонидан кўрилмаганини таъкидлаган.