Нукусда алиментдан қарздор ота опасининг уйидан топилди
Маълумотларга кўра, у 10 йил давомида қидирувда бўлган.
Қорақалпоғистонда алимент тўлашдан бўйин товлаб, қочиб юрган ва 10 йил давомида қидиувда бўлган ота опасининг уйидан топилди. Бу ҳақида МИБ ахборот хизмати Zamon.uz'га маълум қилди.
Қайд этилишича, Мажбурий ижро бюроси Тахиатош туман бўлими иш юритувида мавжуд бўлган, Фуқаролик ишлари бўйича Нукус туманлараро суднинг ижро ҳужжатига асосан ундирувчи А.Н. фойдасига тарбиясидаги икки нафар фарзандлари таъминоти учун қарздор К.Ж.дан алимент ундириш белгиланган.
Ижро ҳужжати ижросини таъминлаш мақсадида қарздорнинг яшаш манзилига борилганида, қарздор ушбу манзилда йўқлиги, у 2016 йили Қозоғистон Республикасига чиқиб қайтиб келмаганлиги аниқланган.
Шу сабабли, унга нисбатан Мажбурий ижро бюроси Тахиатош туман бўлими давлат ижрочиси томонидан қидирув эълон қилинган.
Мажбурий ижро бюроси Қорақалпоғистон Республикаси бошқармаси қидирув шуъбаси ходимларига қарздор фуқаро жорий йилнинг 12 февраль куни Ўзбекистон Республикаси чегарасини кесиб ўтганлиги ҳақидаги тезкор маълумотлари асосида уни қидириш чораларини кўришади ва 18 февраль куни амалга оширилган тезкор-қидирув тадбирлари натижасида қарздор Нукус туманидаги опасининг уйида эканлиги маълум бўлади.
Ижро ҳаракатлари давомида ундирувчи А.Н. жорий йилнинг 19 февраль куни МИБ Тахиатош туман бўлимига келиб, қарздордан жорий йил февраль ойигача бўлган алимент пулларини олганлигини ва ижро ишини тамомлаб беришни сўраган.
