“Нимага ойлик оляпти” — Президент ректорларни кескин танқид қилди
Давлат раҳбари олийгоҳ битирувчиларини иш билан таъминлаш бўйича етарли натижа йўқлигини таъкидлаб, ректорларни қатъий огоҳлантирди
«Кўксарой» қароргоҳида ўтказилган ёшлар билан мулоқотда Президент Шавкат Мирзиёев олий таълим тизимидаги мавжуд муаммолар, хусусан таълим сифати ва битирувчилар бандлиги масалаларига алоҳида тўхталиб, олий таълим муассасалари раҳбарлари фаолиятини кескин танқид қилди.
Давлат раҳбари ўз нутқида бир неча йил давомида фаолият юритиб, талабаларни иш билан таъминлаш бўйича етарли натижага эришмаган ректорлар масъулияти масаласини кўтарди. Президент, олийгоҳда таҳсил олган ҳар бир талабанинг келажакда банд бўлиши муҳим вазифа эканини таъкидлади.
Шунингдек, мамлакатдаги 157 та олий таълим муассасасидан атиги 12 таси битирувчилар билан амалий лойиҳалар асосида ишлаётгани, жумладан, банк кредитлари орқали 100 нафардан ортиқ талабани тадбиркорликка йўналтиргани маълум қилинди.
“Қолган ректорлар қаерга қараб ўтирибди? Нимага ойлик оляпти? Нимага виждони бўлса, 50 фоиз ойлигини кассага топширмайди, давлатга? Виждонимиз ҳам қолмади”, деди давлат раҳбари.
