Ўзбекистонда ҳар ҳафтанинг пайшанба куни “Ёшлар куни” этиб белгиланди
Тошкентда Жаҳон ёшларининг тинчлик сари ҳаракати бош қароргоҳи ташкил этилади, Самарқанд эса қатор нуфузли халқаро тадбирларга мезбонлик қилади.
Кўксарой қароргоҳида ўтказилаётган ёшлар билан мулоқот давомида, жорий йилда Тошкент шаҳрида Жаҳон ёшларининг тинчлик сари ҳаракати бош қароргоҳи ташкил этилиши, Самарқанд шаҳрида Ёшлар парламенти аъзоларининг 12-глобал конференцияси, “Take Off” халқаро стартап саммити ҳамда 46-Бутунжаҳон шахмат олимпиадаси ўтказилиши эълон қилинди.
Президент таълим тизимида сифатни ошириш, янги методика ва инновацияларни жорий этиш масаласига алоҳида тўхталиб, “Албатта, янги методика ва инновация олиб кириб, таълим сифатини ошириш ва болаларни касбининг устаси қилиш ҳақида изланадиган раҳбарнинг фаолиятида ўзгариш бўлади, ишига янгича муҳит киради”, – дея таъкидлади.
Дунёда ёшлар онгини эгаллашга қаратилган турли таҳдидлар кучайиб бораётган бир пайтда барча даражадаги раҳбарлар ёшлар билан ишлашнинг мутлақо янги тизимига ўтиши зарурлиги қайд этилди.
Мамлакатимизда ҳар ҳафтанинг пайшанба куни вазирлик, идора ва ҳокимликларда “Ёшлар куни” этиб белгиланди. Шу куни масъул раҳбарлар маҳалла, мактаб ва техникумларга бориб, ёшларни тинглайди ҳамда уларнинг муаммоларини жойида ҳал этади.
Шунингдек, ҳокимлар томонидан ёшларбоп савдо-сервис лойиҳалари амалга оширилади, ёшларнинг таълим олиши, спорт билан шуғулланиши, касб ва хорижий тил ўрганиши, ишга жойлашиши ёки тадбиркорлик фаолиятини бошлаши учун кўмаклашилади. Стартап ташаббускорлари билан учрашувлар ўтказилиб, алоҳида маблағ ва грантлар ажратилади.
Бундан ташқари, энг яхши томорқачи, фермер, саноатчи, стартапчи, ижодкор ҳамда маънавият ва бошқа йўналишларда фаол ёшлар ўртасида танловлар ва ярмаркалар ташкил этилиши белгиланди.
