Президент Шавкат Мирзиёев Сурхондарёга борди
Давлат раҳбари сафарини Ҳаким Термизий мақбараси зиёратидан бошлади.
Президент Шавкат Мирзиёев 26 февраль куни Сурхондарё вилоятига ташриф буюрди. Давлат раҳбари сафарини анъанага мувофиқ, Термиз шаҳридаги буюк аллома Ҳаким Термизий мақбарасини зиёрат қилишдан бошлади.
Зиёрат чоғида Қуръон тиловат қилиниб, юртимизга тинчлик-осойишталик, халқимизга фаровонлик тилаб дуо қилинди. Шундан сўнг уламолар билан самимий суҳбат бўлиб ўтди.
Мулоқот давомида ислом дини ривожига улкан ҳисса қўшган буюк мутафаккир Ҳаким Термизийнинг бой маънавий-маърифий меросини чуқур ўрганиш, уни юртдошларимиз ҳамда халқаро жамоатчилик ўртасида кенг тарғиб қилиш масалаларига алоҳида эътибор қаратилди.
Шунингдек, муқаддас динимизнинг эзгулик, инсонпарварлик, меҳр-шафқат каби юксак фазилатлари, миллий қадриятларимизни асраб-авайлаш ва ривожлантиришнинг аҳамияти таъкидланди. Шу асосда ёш авлодни эзгу ғоялар руҳида тарбиялаш, уларнинг қалбида Ватанга муҳаббат ва садоқат туйғуларини янада мустаҳкамлаш зарурлиги қайд этилди.
Кейинги йилларда таъмирланиб, янада обод ва гўзал мажмуага айлантирилган ушбу табаррук масканда зиёратчилар учун барча зарур шароитлар яратилган. Ҳудуд кенг кўламда ободонлаштирилиб, мақбарада ҳам салмоқли қурилиш ва таъмирлаш ишлари амалга оширилган. Жумладан, замонавий ёритиш воситалари, иситиш ва совитиш тизимлари ўрнатилган.
Мажмуада қулай микроиқлим яратиш мақсадида тўрт мингдан ортиқ, қарийб 40 турдаги кўп йиллик манзарали дарахтлар ҳамда 20 мингдан зиёд мавсумий гуллар экилган.
Ислом илмларининг тафсир, ҳадис, фиқҳ, калом, ислом фалсафаси, тасаввуф тарихи ва тасаввуфий қарашлар каби йўналишларида кўплаб асарлар яратган мутафаккир мажмуасини обод ҳолда сақлаш, зиёратчилар учун қулайликларни янада кенгайтириш юзасидан масъулларга тегишли топшириқлар берилди.
