Bизасиз режим: Ўзбекистон ва Таиланд ўртасида сафарлар бўйича келишувга эришилди
Ҳозир ҳужжат матни Таиланд томонидан кўриб чиқилмоқда.
Ўзбекистон ва Таиланд ўртасида визасиз сафарлар тўғрисидаги битимни имзолаш бўйича келишувга эришилди. Ҳозирда ҳужжат матни Таиланд томонидан кўриб чиқилмоқда. Бу ҳақда Ўзбекистон Ташқи ишлар вазирлиги маълум қилди.
Аввалроқ ижтимоий тармоқларда Таиланд ҳукумати 2026 йил 15 сентябрдан бошлаб Ўзбекистон фуқаролари, жумладан, сайёҳлар учун электрон виза расмийлаштириш тартибини бекор қилиши мумкинлиги ҳақида хабарлар тарқалган эди.
ТИВ маълумотига кўра, жорий йилнинг май ойидан бошлаб Ўзбекистон фуқароларининг Таиландга сафар қилишлари учун қулай шароит яратиш мақсадида дипломатик музокаралар олиб борилмоқда.
Хусусан, Таиланд Ташқи ишлар вазирлиги билан ўтказилган тўғридан тўғри музокаралар давомида визасиз сафарлар тўғрисидаги битимни имзолаш бўйича келишувга эришилган.
Шу билан бирга, ўзбекистонликларнинг Таиланд электрон визасини расмийлаштиришда дуч келаётган муаммоларини ҳал этиш юзасидан ҳам ишлар олиб борилмоқда.
Бу йўналишда Ўзбекистоннинг Таиланддаги Бош консулхонаси Таиланд Ташқи ишлар вазирлиги ҳамда Туризм ва спорт вазирлиги билан мунтазам учрашувлар ўтказмоқда. Ўзбекистоннинг Россиядаги элчихонаси ҳам Таиланднинг Москвадаги дипломатик ваколатхонаси билан ҳамкорлик қилмоқда.
