Наркотик савдосига оид учта ҳолат фош этилди: 5 кгдан ортиқ модда мусодара қилинди
Ҳолатлар юзасидан жиноят ишлари қўзғатилган.
Тошкент шаҳри ва Фарғона вилоятида ўтказилган тезкор тадбирларда гашиш мойи ва гашиш моддаларини аниқлади. Учта ҳолат бўйича жами 5 килограммдан ортиқ наркотик модда ашёвий далил сифатида олиб қўйилди.
Маълум қилинишича, Юнусобод туманида яшовчи, 1993 йилда туғилган шахс тўхтатилиб, текширилди. Унинг ёнидан учта кичик идишда жами 257 грамм гашиш мойи топилди.
Кейинчалик унинг яшаш манзилида ўтказилган текширувда соф оғирлиги 2 килограмм 831 грамм бўлган гашиш мойи ва электрон тарози ашёвий далил сифатида олинди. Маълум қилинишича, ушбу шахс интернет орқали фаолият юритувчи наркодўконда ишлаган.
Фарғона вилоятида ўтказилган тезкор тадбирларда ҳам наркотик моддалар савдоси билан боғлиқ ҳолатлар аниқланган.
Жумладан, Фарғона туманида яшовчи, 1988 йилда туғилган шахс қўшни давлатдан контрабанда йўли билан олиб келинган 982 грамм гашишни шартли харидорга 10 700 АҚШ долларига сотмоқчи бўлганида ушланди.
Яна бир ҳолатда Фарғона шаҳрида яшовчи, 1997 йилда туғилган фуқаро қўшни давлатдан контрабанда қилинган ва Фарғона туманидаги яширин жойга қолдирилган 956 грамм гашишни олиб, уйига қайтаётганида қўлга олинди.
Қайд этилишича, учала ҳолат юзасидан жиноят ишлари қўзғатилган ва ҳозирда тергов ҳаракатлари олиб борилмоқда.
