Эрон Ҳўрмуз бўғози учун бож ундиришни кўриб чиқмоқда
Ҳўрмуз бўғозида кемаларининг хавфсиз ҳаракати таъминланиши учун мамлакатлар бож тўлашга мажбур бўлади.
Эрон парламенти вакили Сомаяҳ Рафаий маълум қилишича, қонун чиқарувчилар Ҳўрмуз бўғози учун бож ундириш таклифини кўриб чиқмоқда. Бу ҳақда BBC хабар берди.
Таклифга кўра, агар Ҳўрмуз бўғози кемаларнинг хавфсиз ўтиш йўли, энергия транзити ва озиқ-овқат хавфсизлигини таъминлаш учун ишлатилса, мамлакатлар Эронга бож ва солиқ тўлашга мажбур бўлади.
ISNA ахборот агентлигининг хабар беришича, Рафаий Теҳроннинг Валиаср майдонида бўлиб ўтган оммавий йиғилишда Эроннинг “Ҳўрмуз бўғози хавфсизлигини таъминлаш ва миллий манфаатларни ҳимоя қилишдаги ваколати”ни таъкидлаган.
“Биз душманларимизни аввалги қулайликлардан маҳрум этдик, бу ҳолатга чидашга уларнинг сабри етмайди. Худо хоҳласа, бу уруш Эроннинг ишончли ва қатъий ғалабаси билан якунланади. Шундан сўнг Ҳўрмуз бўғози орқали ўтиш душманларимиз учун қийинчиликлар туғдиришда давом этади,”— деди Рафаий.
Бу таклиф минтақадаги глобал транзит ва энергия йўлларини назорат қилиш бўйича Эроннинг сиёсий стратегиясини акс эттирувчи муҳим чора сифатида баҳоланмоқда.
