Дунё етакчилари Шавкат Мирзиёевни Наврўз билан қутлади

Баҳор фаслининг кириб келиши ва табиатнинг уйғониши билан уйғун равишда нишонланадиган қадимий байрам — Наврўзи олам муносабати билан Шавкат Мирзиёев номига хорижий давлатлар ва ҳукуматлар раҳбарлари, нуфузли халқаро ташкилотлар етакчилари, шунингдек, сиёсат ва жамоат арбобларидан самимий табриклар келмоқда.

 

Табрикномаларда Ўзбекистоннинг кўп миллатли халқига тинчлик-осойишталик, барқарор тараққиёт, фаровонлик ва равнақ тилаклари изҳор этилган. Наврўзнинг инсоният тарихидаги ўрни, унинг янгиланиш, эзгулик ва ҳамжиҳатлик тимсоли экани алоҳида таъкидланган.

 

Хорижий етакчилар ўз табрикларида Ўзбекистонда амалга оширилаётган кенг кўламли ислоҳотлар, Янги Ўзбекистонни барпо этиш йўлидаги саъй-ҳаракатлар, иқтисодий ривожланиш суръатлари ҳамда аҳоли турмуш даражасини яхшилашга қаратилган ташаббусларга юқори баҳо берган.

 

Шунингдек, мамлакатнинг очиқ ва прагматик ташқи сиёсати, минтақада яхши қўшничилик, ўзаро ишонч ва ҳамкорликни мустаҳкамлашга қаратилган ташаббуслари халқаро ҳамжамият томонидан ижобий эътироф этилаётгани қайд этилган.

 

Наврўз байрами муносабати билан Президент номига қутлов йўллаганлар орасида Владимир Путин, Си Сзинпин, Салмон бин Абдулазиз Ал Сауд, Муҳаммад бин Салмон, Режеп Таййип Эрдоған, Қосим-Жомарт Тоқаев, Садир Жапаров, Эмомали Раҳмон, Сердар Бердимуҳамедов, Гурбангули Бердимуҳамедов, Илҳом Алиев, Александр Лукашенко ҳамда Шаҳбоз Шариф каби давлат раҳбарлари бор.

 

Қутловларда Наврўзнинг халқларни бирлаштирувчи, дўстлик ва ҳамкорликни мустаҳкамловчи муҳим байрам экани таъкидланиб, Ўзбекистон билан икки томонлама алоқаларни янада ривожлантиришга тайёрлик билдирилган.

 

Жумладан, Россия Президенти Владимир Путин ўз табригида Россия ва Ўзбекистон ўртасидаги стратегик шериклик ва иттифоқчилик муносабатлари бундан буён ҳам икки халқ фаровонлиги ҳамда Марказий Осиёда хавфсизлик ва барқарорликни мустаҳкамлаш йўлида ривожланиб боришига ишонч билдирган.

 

Хитой раҳбари Си Сзинпин эса ўз мурожаатида Хитой ва Ўзбекистон ўртасидаги ҳар томонлама стратегик шериклик муносабатлари янги босқичга кўтарилаётганини таъкидлаб, икки мамлакат ўртасидаги ҳамкорликни янада кенгайтиришга тайёр эканини қайд этган.

 

Туркия Президенти Режеп Таййип Эрдоған Наврўзнинг халқлар ўртасидаги дўстлик ва ҳамжиҳатликни мустаҳкамловчи қадимий байрам эканини қайд этиб, қардош халқлар ўртасидаги алоқалар янада ривожланишига тилак билдирган.

 

Марказий Осиё давлатлари раҳбарлари ҳам ўз табрикларида минтақада яхши қўшничилик, ўзаро ишонч ва стратегик ҳамкорликни мустаҳкамлаш муҳимлигини алоҳида таъкидлаган.

 

Шунингдек, бир қатор халқаро ташкилотлар раҳбарлари ҳам Президент номига қутлов йўллаган. Улар орасида Нурлан Ермекбаев, Кубаничбек Омуралиев ҳамда бошқа нуфузли ташкилотлар вакиллари бор.

 

Бундан ташқари, турли мамлакатлар сиёсий ва жамоат арбоблари, диний ташкилотлар вакиллари ҳам Наврўз муносабати билан самимий табриклар йўллаган.

 

Президент номига келаётган табриклар давом этмоқда.