Сурхондарёда картошка кўринишидаги 72 кг гиёҳванд модда аниқланди

Афғонистондан Ўзбекистонга кириб келган юк машинасида картошка кўринишида ниқобланган гиёҳванд модда аниқлади. Бу ҳақда Zamon.uz'га ДХХ маълум қилди.

 

Маълум қилинишича, Сурхондарё вилояти Термиз туманида 2001 йилда туғилган фуқаронинг бошқарувидаги “МАН” юк автомашинаси Афғонистондан кириб келган пайтда Давлат хавфсизлик хизмати (ДХХ) Чегара қўшинлари ва Божхона идоралари ходимлари ҳамкорлигида текширилган.

 

Текширув давомида автомашина юкхонасидаги картошкалар орасида картошка кўринишида тайёрланган 222 дона бўлак, жами 72,3 кг “гашиш” моддаси яширилгани аниқланган ва расмий равишда ҳужжатлаштирилган.

 

Дастлабки маълумотларга кўра, ушбу гиёҳвандлик воситалари Россияга олиб кетилаётган бўлган. Ҳозирда ҳолат бўйича суриштирув ишлари олиб борилмоқда.