Самарқандда АҚШдан жўнатилган наркотик тўхтатиб қолинди
У электрон тамаки ичига солинган ҳолда ва курьерлик орқали юборилган.
Самарқанд вилоятида Америкадан жўнатма сифатида юборилган гиёҳвандлик моддалари тўхтатиб қолинди. Бу ҳақда “Тошкент-АЭРО” ихтисослаштирилган божхона комплекси ахборот хизмати хабар берди.
Қайд этилишича, курьерлик жўнатмалари орқали гиёҳвандлик моддаларининг олиб кирилиши ва реализациясига қарши навбатдаги тезкор-қидирув тадбирлари ўтказилган.
Тезкор тадбир давомида Самарқанд шаҳрида яшовчи икки нафар фуқаро АҚШдан юборилган, ичида 75 гр оғирликдаги жами 68 дона “гашиш мойи” мавжуд бўлган электрон сигарет (вейп)лар солинган жўнатмани қабул қилиб олаётган вақтида қўлга олинган.
Ҳозирда мазкур ҳолат юзасидан божхона органлари томонидан жиноят иши қўзғатилган.
Эслатиб ўтамиз, республика божхоначилари томонидан жорий йилнинг шу даврига қадар 208 та ҳолатда салкам 558 кг гиёҳвандлик воситаларининг олиб ўтилиши олди олинган.
