Сифати кафолатланмаган дори воситалари фош этилди

Паркент туманидаги “Паркент эркин иқтисодий” зонасида фармацевтика маҳсулотлари ишлаб чиқарувчи МЧЖ текширилганда сифати кафолатланмаган дори воситалари топилди. Бу ҳақда ДХХ хабар берди.

 

Маълум қилинишича, текширув натижасида корхона омборхонасида яроқлилик муддати тугаган 55 840 дона “Меновазин”, 25 000 дона “Водород пероксиди”, 50 800 дона “Этил спирти” ҳамда 28 миллион 270 мингдан ортиқ ёрлиқ ва этикеткалар сақланаётгани аниқланган. 

 

Маълум бўлишича, яроқлилик муддати тугаган дори воситаларининг 2025-2026 йилларда ишлаб чиқарилган деган маълумотлар билан қайта қадоқланиб, сотувга чиқарилиши режалаштирилган.

 

Шу билан бирга, пойтахтда Фарғона шаҳрида яшовчи 1987 йилда туғилган фуқаро тўхтатилиб, унинг қўл юклари текширилганда, Ўзбекистонга олиб кирилиши тақиқланган, тахминий қиймати 763 млн сўмни ташкил этувчи 19 турдаги жами 6 597 дона дори воситалари аниқланди.

 

Дастлабки суриштирув жараёнида мазкур шахс дори воситаларини Ҳиндистондан олиб келиб, сотишни 1984 йилда туғилган таниши билан биргаликда амалга ошириши маълум бўлди. Унинг хонадони ҳам кўздан кечирилиб, тахминий қиймати 48 млн сўмга тенг бўлган 107 дона дори воситалари топилди.

 

Ҳозирда ҳар икки ҳолат бўйича ашёвий далил сифатида олинган дори воситаларига экспертиза тайинланиб, суриштирув ишлари олиб борилмоқда.