Ўзбекистонда икки наркожиноий гуруҳ фош этилди
Гуруҳнинг 7 нафар аъзоси қўлга олинди.
Хавфсиз ва соғлом юрт” тезкор-профилактик тадбирлари доирасида ҳуқуқни муҳофаза қилувчи органлар томонидан йирик наркожиноят тармоқлари фош этилди. Бу ҳақда ЎзА хабар берди.
Ички ишлар вазирлиги маълум қилишича, икки уюшган жиноий гуруҳнинг 7 нафар аъзоси қўлга олинган.
Тезкор маълумотларга кўра, трансмиллий жиноий уюшма аъзолари қўшни давлатдан Тошкент орқали Россияга катта миқдордаги гиёҳвандлик воситаларини контрабанда йўли билан олиб ўтишни режалаштирган.
Ўтказилган тезкор-қидирув тадбирлари давомида Тошкент шаҳрининг Янгиҳаёт туманида жойлашган дала майдонига яширилган 71 килограмм 84 грамм гиёҳвандлик воситасини олиб кетаётган 4 нафар шахс қўлга олинди. Улар мазкур гиёҳванд моддаларни Россияда яшовчи танишининг кўрсатмаси асосида олиб, хорижга юбориши керак бўлган. Ушбу ҳолат орқали 355 мингдан ортиқ дозадаги гиёҳвандлик воситаларининг ноқонуний айланмасига чек қўйилди.
Тезкор тадбирлар Сурхондарё вилоятининг Денов туманида ҳам давом эттирилди. Бу ерда 1969 йилда туғилган шахс 150 минг АҚШ доллари эвазига 8 кг гиёҳвандлик воситасини сотаётган вақтида ушланди.
Тергов давомида у ушбу моддаларни танишидан олгани аниқланиб, кейинчалик яна икки шахс ҳам қўлга олинди. Натижада қўшимча равишда 40 минг дозага тенг гиёҳвандлик воситаларининг тарқалишининг олди олинди.
Мазкур ҳолатлар юзасидан Жиноят кодексининг 273-моддаси 5-қисми билан жиноят иши қўзғатилиб, гумонланувчилар қамоққа олинган.
Шунингдек, Андижон шаҳрида кучли таъсир қилувчи дори воситаларининг ноқонуний савдоси ҳам фош этилди. Бир аёл ва икки эркак “Тропикамид” ва “Прегабалин” препаратларини ноқонуний сақлаб, реализация қилмоқчи бўлган вақтида қўлга олинди.
Кўздан кечириш жараёнида гумонланувчилардан жами 6,5 минг донага яқин “Регапен” ва “Тропикамид” номли дори воситалари, шунингдек номаълум суюқлик ва капсулалар мусодара қилинди.
Ушбу ҳолат юзасидан ҳам жиноят иши қўзғатилган бўлиб, тергов ҳаракатлари давом этмоқда.
