Тошкентда ўзини аёл сифатида таништириб, пул талаб қилган гуруҳ ушланди
Улар турли ёшдаги эркакларни алдаб, учрашувга чақирган.
Тошкентда ўзини аёл сифатида таништириб, эркаклардан пул талаб қилган беш нафар йигит ҳуқуқ-тартибот органлари томонидан қўлга олинди.
Маълум бўлишича, 18–21 ёшдаги шахслар Telegram мессенжери орқали ўзларини аёл деб таништириб, турли ёшдаги эркаклар билан танишган ва уларни учрашувга чақирган. Уйга кирган жабрланувчи спортчилар деб аталувчи гуруҳ аъзолари томонидан ҳақорат қилиниб, калтакланган. Воқеа видеога олиниб, 10 миллион сўм талаб қилинган.
Жиноий гуруҳ талаб қилинган пулнинг 5 миллион сўмини олган пайтда ҳуқуқ-тартибот органлари томонидан ушланган. Пулни топширишдан бош тортилган тақдирда, жиноятчилар видео ёзувларни интернетга чиқариш ва омма олдида шарманда қилиш билан таҳдид қилган.
Тергов давомида аниқланишича, гуруҳ ташкилотчиси илгари Ўзбекистон Республикаси Жиноят кодексининг 120-моддаси бўйича судланган шахс бўлиб, гуруҳга турли спорт турлари билан шуғулланувчи шахсларни жалб қилган.
Мазкур ҳолат юзасидан жиноят кодексининг 165-моддаси 2-қисми “в” банди билан жиноят иши қўзғатилиб, тергов ҳаракатлари давом этмоқда.
