Наманганда болаларга зўравонлик қилган аёлга суд ҳукми ўқилди
Аёлга болаларни васийликка олиб, қарагани учун давлат томонидан ҳар ой пул ажратилган.
Наманган вилояти Поп туманида қарамоғидаги вояга етмаган болаларга нисбатан зўравонлик қилган аёлга нисбатан суд ҳукми эълон қилинди. Бу ҳақда “Дарё” суд ҳужжатларига таяниб хабар берди.
Маълум қилинишича, 1986 йилда туғилган Н.С. 2025 йил апрель ойида Наманган шаҳридаги меҳрибонлик уйи негизида ташкил этилган икки ойлик ўқув курсини тамомлаган. Шундан сўнг, май ойида у 2019 ва 2023 йилларда туғилган икки нафар болани шартнома асосида васийликка олган. Болаларни парвариш қилгани учун унга давлат томонидан ҳар ой 6 миллион сўм миқдорида маблағ ажратиб борилган.
Суд ҳужжатларига кўра, аёл 20–27 октябрь кунлари давомида турли баҳоналар билан болаларни мунтазам равишда уриб, уларга жисмоний ҳамда руҳий азоб етказган. Шунингдек, у болаларни ушбу ҳолат ҳақида бошқаларга айтмасликка мажбур қилиб, акс ҳолда уларни шароити оғир жойга бериб юбориш билан қўрқитган.
27 октябрь куни болалар тарбияланаётган мактабгача таълим муассасаси директори уларнинг ҳолатини пайқаб, Поп тумани “Инсон ижтимоий хизматлари” марказига ҳамда ҳуқуқни муҳофаза қилувчи органларга мурожаат қилган.
Суд жараёнида айбланувчи ўз кўрсатмасида укасининг Россияда вафот этгани ҳақидаги хабардан сўнг руҳий тушкунликка тушганини, шу сабаб болаларга нисбатан ёмон муносабатда бўлганини билдирган ва қилган ишидан пушаймон эканини айтган.
Жиноят ишлари бўйича Поп тумани суди ҳукмига кўра, Н.С. Жиноят кодексининг 110-моддаси 2-қисми “а” ва “в” бандлари билан айбли деб топилиб, унга 2 йил муддатга озодликни чеклаш жазоси тайинланди.
Болалар аёлнинг васийлигидан олиниб, бошқа оилавий болалар уйига жойлаштирилган.
Аввалроқ Тошкент шаҳрининг Юнусобод туманида 13 ёшли қизга нисбатан зўравонлик қилган ўгай онага нисбатан ҳам жиноят иши қўзғатилгани ҳақида хабар берилганди.
