Тошкентда гиёҳванд моддалар савдоси билан шуғулланган талабалар ушланди

Тошкент шаҳрида гиёҳванд моддалар савдоси билан шуғулланган бир гуруҳ шахслар, жумладан талабалар ушланди. Бу ҳақда Ўзбекистон Ички ишлар вазирлиги хабар берди.

 

Маълум қилинишича, Миробод ва Мирзо Улуғбек туманларида жами 1 килограмм 604 грамм турли турдаги гиёҳвандлик воситаларининг ноқонуний тарқалиши олди олинган.

 

Хусусан, 2004 йилда туғилган талаба йигит Миробод туманида “закладка” усулида изоляцион лента билан ўралган марихуанани жойлаштираётган вақтида ушланган. Аниқланишича, у уч ой давомида Тelegram'даги ноқонуний “наркодўкон” кўрсатмалари асосида йирик миқдордаги гиёҳвандлик воситаларини тарқатиб келган.

 

Йигитнинг ижарадаги яшаш хонадонидан 698 грамм альфа-ПВП, 471 грамм мефедрон, 433 грамм марихуана, шунингдек, электрон тарозилар, 600 дона зип-пакет, изоляцион лента ва номаълум суюқликлар топилиб, ашёвий далил сифатида расмийлаштирилган.

 

Шунингдек, Яккасарой туманида ўтказилган тадбирда 2001 йилда туғилган “наркошоп” администратори ҳамда унинг 1998 йилда туғилган шериги қўлга олиниб, уларда альфа-ПВП, тропикамид ва гиёҳвандлик воситаларини истеъмол қилишда фойдаланиладиган мосламалар борлиги аниқланган.

 

Қибрай туманида эса 2005 йилда туғилган қиз яшаётган хонадондан тропикамид дори воситалари топилган. Бундан ташқари, муқаддам судланган интернет нарко-дўкон операторининг уйидан 80 грамм альфа-ПВП, мефедрон, суюқ ҳолатдаги альфа-ПВП, прегабалин, электрон тарози, зип-пакет ва магнитлар топилиб, далил сифатида ҳужжатлаштирилган.

 

Тезкор кузатув давомида ушбу хонадондан чиқиб келаётган 2004 ва 2006 йилда туғилган икки нафар талаба ёнида тарқатиш учун тайёрланган 30 дона альфа-ПВП моддаси борлиги қайд этилган.

 

Мазкур ҳолат юзасидан Ўзбекистон Республикаси Жиноят кодексининг 273-моддаси 5-қисми билан ҳамда 251-прим 1-моддаси 2-қисми билан жиноий иш қўзғатилган.