Фарғонада фермер 3,7 гектар ерни 7 гектар деб сотмоқчи бўлди
У ер учун 20 минг доллардан ортиқ маблағ талаб қилган.
Фарғона вилояти Қўштепа туманида фермер хўжалиги раҳбари томонидан ер майдонини ноқонуний тарзда сотишга уриниш ҳолати аниқланди. Бу ҳақда Zamon.uz'га ДХХ хабар берди.
Маълум қилинишича, қишлоқ хўжалиги билан шуғулланувчи фермер хўжалиги раҳбари харидорни хўжалик тасарруфидаги 3,7 гектар ерни гўёки 7 гектар деб ишонтириб, унинг номига расмийлаштириб беришни ваъда қилган. Бунинг эвазига у 20 минг доллар ҳамда 100 миллион сўм талаб қилган.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирда фермер келишилган пул маблағининг 15 минг долларини учинчи шахс орқали олган вақтида қўлга олинган.
Ҳолат юзасидан жиноят иши қўзғатилиб, айни пайтда тергов ҳаракатлари олиб борилмоқда.
