Ўзбекистонда 35 килограммдан ортиқ гиёҳванд моддалар контрабандаси фош этилди

Ўзбекистонда 35 килограммдан ортиқ гиёҳвандлик воситаларининг ноқонуний айланмасига чек қўйилди. Бу ҳақда ДХХ хабар берди.

 

Маълум қилинишича, Тошкент вилоятида ДХХ Чегара қўшинлари ҳарбий хизматчилари ҳамда ҳудудий бошқарма ходимлари ҳамкорлигида ўтказилган тезкор тадбирда 2003 ва 1998 йилларда туғилган икки нафар фуқаро давлат чегарасини ноқонуний кесиб ўтган вақтида қўлга олинган.

 

Уларнинг ёнида бўлган икки дона спорт сумкасидан 4 кг 884 грамм “опий”, 19 кг 863 грамм “гашиш” моддалари, шунингдек 380 қути “Esse Change” номли тамаки маҳсулотлари аниқланиб, ашёвий далил сифатида расмийлаштириб олинган.

 

Мазкур ҳолат юзасидан гумонланувчиларга нисбатан Жиноят кодексининг 223, 246 ва 273-моддалари билан жиноят иши қўзғатилиб, “қамоқ” эҳтиёт чораси қўлланилган.

 

Шунингдек, Сурхондарё вилоятида ўтказилган тезкор-қидирув тадбирлари давомида Афғонистондан контрабанда йўли билан олиб кирилган гиёҳвандлик воситалари ҳам фош этилган.

 

Хабарга кўра, 1978, 1981 ва 2004 йилларда туғилган уч нафар шахс давлат чегарасини бузган ҳолда, автомобиль ғилдираги камераси ёрдамида Амударё орқали сузиб ўтаётган вақтда ушланган.

 

Текширув жараёнида уларнинг ёнида бўлган халталардан 2 кг 708 грамм “опий” ва 8 кг 257 грамм “гашиш” моддалари топилган.

 

Аниқланишича, мазкур шахсларга гиёҳвандлик воситаларини манзилга етказиб бериш эвазига ҳар бир килограмм учун 200 АҚШ доллари миқдорида ҳақ ваъда қилинган.

 

Ҳолат юзасидан ушбу шахсларга нисбатан Жиноят кодексининг 223 ва 246-моддалари билан жиноят иши қўзғатилиб, “қамоқ” эҳтиёт чораси қўлланилган. Айни пайтда тергов ҳаракатлари давом этмоқда.