Вашингтонда Америка–Ўзбекистон ишбилармонлик кенгаши иш бошлади
Саида Мирзиёева Сержио Гор билан англашув меморандумини имзолади.
Президент администрацияси раҳбари Саида Мирзиёева Америка–Ўзбекистон ишбилармонлик ва инвестиция кенгаши ҳамраиси, элчи Сержио Гор билан Вашингтонда учрашув ўтказди. Бу ҳақда у ўзининг Telegram саҳифасида маълум қилди.
Маълум қилинишича, учрашув Америка–Ўзбекистон ишбилармонлик ва инвестиция кенгаши фаолияти расман бошланиши арафасида бўлиб ўтган. Томонлар Ўзбекистон ва АҚШ ўртасидаги ишбилармонлик ҳамкорлигининг асосий йўналишларини муҳокама қилган.
“Ушбу тузилма Ўзбекистон ва Қўшма Штатлар ўртасидаги бизнес алоқаларни янада мустаҳкамлашга хизмат қиладиган самарали майдонга айланиши шубҳасиз. Бунга мамлакатларимиз Президентларининг қатъий сиёсий иродаси мустаҳкам замин яратмоқда”, — деган Саида Мирзиёева.
Шунингдек, учрашув якунида ўзаро англашув меморандуми имзоланди.
Аввалроқ Президент администрацияси раҳбари 6 апрель куни Сержио Гор билан Мар-а-Лагода ҳам учрашган эди.
