Самарқанддаги мактабда аёл 1-синф ўқувчисига ҳужум қилди
Синфдошлар жанжаллашиб қолгани ортидан, болалардан бирининг онаси мактабга келиб жанжал кўтариб, болаларга ташланган.
Самарқанд вилояти, Қўшработ туманидаги 53-умумтаълим мактабида 1-синф ўқувчисининг онаси бошқа ўқувчиларга нисбатан жисмоний ва руҳий зўравонлик қилгани маълум бўлди. Ҳолат акс этган видео ижтимоий тармоқларда тарқалди. Унда аёл синфда жанжал кўтариб, икки болага қўл кўтаргани ва ҳақорат қилгани акс этган. Синфда бошқа бир неча аёллар бўлган, шунингдек, хонага кирган эркаклар жанжални тўхтатишга ҳаракат қилган.
Маълум бўлишича, воқеа 3 апрель куни содир бўлган. Қўшработ туманида жойлашган 53-умумтаълим мактабининг 1-синф ўқувчилари мактабда дарс машғулотлари тугагач, мактабдан уйларига кетаётган вақтида ўзаро низолашгани туфайли 6 апрель куни ўқувчи Э.Ҳ (2018 йилда туғилган ўғил бола)нинг онаси М.Й (1981 йилда туғилган аёл) мактабга келиб, ўқув синфида ўқувчилар олдида жанжал кўтариб, гўёки ўғли билан уришган О.Ҳ (2018 йилда туғилган ўғил бола) ва С.Р (2018 йилда туғилган ўғил бола) ларни таъқиб этиб, урган ва ҳақорат қилган.
Ҳозирда Қўшработ тумани ИИБ томонидан ушбу ҳолат юзасидан терговга қадар текширув ҳаракатлари олиб борилмоқда.
Самарқанд вилояти Мактабгача ва мактаб таълими бошқармаси мактабдаги таълим жараёнига ташқи шахсларнинг аралашиши ва ўқувчиларнинг жисмоний ёки руҳий соғлиғига зарар етказувчи ҳаракатлар қатъиян тақиқланганини билдирган. Шу каби вазиятларга мактаб масъуллари йўл қўймаслиги лозим.
Айни пайтда мазкур ҳолат ҳуқуқни муҳофаза қилувчи органлар томонидан назоратга олинган.
