Тошкент аэропортида йўловчининг пулини ўғирлаган чет эллик ушланди
У жабрланувчини чалғитиб, пул маблағларини яширин равишда олиб қўйган.
“Ислом Каримов” номидаги Тошкент халқаро аэропортида йўловчининг 9000 АҚШ долларини ўғирлаган шахс қўлга олинди. Бу ҳақда Транспорт ва туризм объектларида хавфсизликни таъминлаш департаменти хабар берди.
Маълум қилинишича, 4 апрель куни 1994 йилда Жиззах вилоятида туғилган фуқаро 102-сонли Нью-Йoрк–Тошкент йўналишидаги авиарейс орқали Ўзбекистонга етиб келган. У ўз юкини текшириш жараёнида ҳамёнидан жами 9000 АҚШ доллари миқдоридаги пул маблағлари йўқолганини аниқлаган ва зудлик билан бу ҳақда шу ернинг ўзида хизмат олиб бораётган патруль-пост хизмати ходимига хабар берган. Хабар асосида ходимлар қидирув ўтказиб, пул маблағларини ва уларни олган шахсни топган.
“Нью-Йoрк–Тошкент йўналиши бўйича самолётда учиб келдим ва самолётда регистрациядан ўтган вақтимда мана шу барсеткамда менга тегишли бўлган 9000 АҚШ доллари бўлган пул йўқлигини сездим ва ўша вақтнинг ўзида пост-патруль ходимига мурожаат қилдим. У ходим тезкор тадбирлар, чоралари билан шу пулимни топиб беришди. Ички ишлар ходимларига катта раҳмат айтаман” — дейди фуқаро.
Аниқланишича, ушбу рейсда бирга парвоз қилган 1982 йилда туғилган чет эл фуқароси бўлган шахс жабрланувчини чалғитган ҳолда унинг 9000 АҚШ доллари миқдоридаги пул маблағларини яширин равишда ўғирлаб олган.
Ушбу шахс самолёт ичида 9000 АҚШ долларига кўзи тушганини ва уларни олиб ҳамёнига қўшиб қўйганини билдириб, афсусдалигини айтган.
