Тошкентда 6,7 миллиард сўмлик крипто-активларни ноқонуний ўзлаштирган шахс ушланди
Гумонланувчи телефонида турли аккаунтлар орқали катта миқдорда крипто-активлар айланмаси билан шуғулланган.
Тошкент шаҳри Яшнобод туманида лицензиясиз криптовалюта айланмаси билан шуғулланган шахс ушланди. Бу ҳақда Тошкент шаҳар ИИББ хабар берди.
Маълум қилинишича, текширувлар жараёнида 2004 йилда Сирдарё вилоятида туғилган, ҳозирда Тошкент шаҳрида яшовчи фуқаронинг iPhone 15 Pro русумли телефони холислар иштирокида кўздан кечирилган. Унда фуқаро смартфонига ўрнатилган иловалар ва турли аккаунтлар орқали катта миқдорда криптоактивлар айланмаси билан шуғуллангани аниқланган.
Жумладан, гумонланувчи P2P орқали ноқонуний кирим-чиқим операциялари ёрдамида жами 556 100 УСДТдан кўпроқ маблағни ўзлаштирган. Мазкур сумма 6 миллиард 700 миллион сўмдан зиёдни ташкил этади.
Фуқаро тергов жараёнида қилган ишидан пушаймонлигини билдирган ва келгусида бундай фаолият билан шуғулланмаслигини маълум қилган.
Ҳозирда мазкур ҳолат юзасидан Ўзбекистон Республикаси Жиноят кодексининг 278-прим 8-моддаси билан жиноят иши қўзғатилган, гумонланувчига нисбатан қамоққа олиш эҳтиёт чораси қўлланилган. Тергов ишлари давом этмоқда.
