Тошкентда болаларга ноқонуний диний таълим берган шахслар ушланди.

Тошкент шаҳрида ноқонуний диний таълим бериш ҳолатлари аниқланди. Бу ҳақда Zamon.uz'га ДХХ маълум қилди.

 

Маълум қилинишича, 1992 йилда туғилган, ҳозирда пойтахтдаги нодавлат олий таълим муассасасининг 2-босқич талабаси бўлган шахс Янгиҳаёт туманидаги хонадонлардан бирини ижарага олиб, моддий манфаатдорлик эвазига, 2014–2021 йиллар оралиғида туғилган 9 нафар вояга етмаган болаларга диний сабоқ бериб келган.

 

Текширув жараёнида 49 дона турли диний мазмундаги китоблар, 24 дона диний дарсликлар ёзилган дафтарлар ҳамда 1 дона ноутбук ашёвий далил сифатида олинган.

 

Дастлабки маълумотларга кўра, болаларга мажбурий равишда сабоқ берилган, айрим ҳолларда эса уларга турли даражада тан жароҳатлари ҳам етказилган.

 

Шунингдек, болалардан 6 нафари 2 ойдан 8 ойгача умумтаълим мактабидаги дарсларга бормаган, аксинча, мажбуран уйда сақланиб, ҳатто уларга кўчага чиқишга ҳам рухсат берилмаган.

 

Ҳозирда ушбу манзилдан олинган диний адабиётлар ва компьютер техникаси юзасидан тегишли экспертизалар тайинланиб, қонунбузар фуқарога нисбатан Жиноят Кодексининг 229²-моддаси 2-қисми билан жиноят иши қўзғатилди.

 

Шунингдек, болаларнинг ота-оналарига нисбатан Маъмурий жавобгарлик тўғрисидаги Кодекснинг 47-моддаси асосида маъмурий баённомалар тузилган.

 

Шу билан бирга, Янгиҳаёт туманида юқорида келтирилган талабанинг  нодавлат олий таълим муассасасидаги ўқитувчиси ҳам ижара хонадонда болаларга ноқонуний тарзда диний сабоқ бераётгани маълум бўлди.

 

У ва турмуш ўртоғи томонидан 2009–2018 йилларда туғилган 5 нафар болага сабоқ ўтилган бўлиб, улар орасида Тожикистон Республикаси фуқаросининг ҳам фарзанди бор.  

 

Ҳозирда ушбу ҳолат бўйича тегишли экспертиза тайинланиб, терговга қадар текширув ишлари олиб борилмоқда.