Тошкентда МЧЖ ертўласидан 50 минг доллар ўғирлаган “курьер” ушланди

Тошкент шаҳрида жойлашган масъулияти чекланган жамият ертўласидан ичида 50 минг АҚШ доллари бўлган сейфни ўғирлаган шахслар қўлга олинди. Бу ҳақда Тошкент шаҳар ИИББ хабар берди.

 

Маълум қилинишича, ҳодиса Юнусобод тумани 2-мавзесида содир бўлган. Номаълум шахс МЧЖ ертўласидан ичида катта миқдорда пул бўлган сейфни ўғирлаб кетган. Ҳолат юзасидан ички ишлар органларига хабар келиб тушгач, тезкор-қидирув тадбирлари олиб борилган.

 

Тезкор чора-тадбирлар натижасида жиноятни содир этишда гумонланаётган шахслар аниқланиб, ушланган. Улар — 1988 йилда туғилган Б., 2000 йилда туғилган Ш. ҳамда мазкур МЧЖда ҳайдовчи бўлиб ишлаган А. экани маълум бўлган.

 

Тергов маълумотларига кўра, жиноятни амалга оширишда МЧЖ ходими — ҳайдовчи А. ёрдам берган. У шерикларига самокат, буюртма етказувчилар сумкаси ва шлем тақдим этган. Ш. эса тунда офисга бориб, ертўлада жойлашган сейфни олиб, ҳодиса жойидан яширинган.

 

Гумонланувчилардан бири қилмишидан пушаймон эканини билдириб, ўз хатосини тан олган. Яна бири эса оиласи ва фарзандлари олдида уятга қолганини айтган ҳамда кечирим сўраган.

 

Мазкур ҳолат юзасидан Юнусобод тумани Ички ишлар органлари фаолиятини мувофиқлаштириш бошқармаси тергов бўлими томонидан Жиноят кодексининг 169-моддаси (ўғрилик) билан жиноят иши қўзғатилган. 

 

Ушбу моддага мувофиқ, айбдорларга нисбатан 15 йилгача озодликдан маҳрум қилиш жазоси тайинланиши мумкин.