Самарқандда 1-синф ўқувчисига ҳужум қилган аёл судга берилди

Самарқанд вилоятида мактаб ўқувчиларига нисбатан зўравонлик қилган аёлга оид иш судга юборилди. Бу ҳақда “Zamon” информацион дастурида хабар берилди.

 

Ҳодиса 3 апрель куни Қўшработ туманидаги 53-умумтаълим мактабида содир бўлганди. Дарсдан сўнг уйга қайтаётган 1-синф ўқувчилари ўртасида келиб чиққан низодан кейин, 6 апрель куни жанжалда жабрланган боланинг 45 ёшли онаси мактабга келган.

 

Аёл синф хонасида ўқувчилар ва ота-оналар олдида жанжал кўтарган ҳамда ўғлини урган деб гумон қилинган синфдош болаларни урган.

 

Ўқитувчининг айтишича, у воқеа ҳақида хабар топгач, ўқувчиларнинг ота-оналарини мактабга чақирган ва улар билан суҳбат ўтказган. Бироқ кейинчалик синфга кирганида аёл аллақачон у ерда бўлган ва ўғлини қайси бола урганини сўрагач, жанжал бошланиб кетган.

 

Ҳолат юзасидан аёл ўз ҳаракатини изоҳлар экан, ҳиссиётга берилиб кетганини тан олиб, қилган ишидан пушаймон эканини билдирган.

“Келган вақтимда урган болаларнинг оналари мени кулиб қарши олди. Уларни кўриб менинг жаҳлим чиқди. 'Равшан ким?' дедим. 'Тур болам', деди Равшаннинг онаси. Мен у болаларни танимайман ҳам. Жаҳлим чиққандан уларни уриб кетдим. Мен онаман. Ўзимни босолмасдан у болажонларни уриб юбордим. Қилган ишимдан афсусдаман. Бундай ҳолат такрорланмаслигини хоҳлайман”, — деган у.

 

Мазкур воқеа бўйича Қўшработ тумани ички ишлар бўлими томонидан уч нафар вояга етмаган ўқувчиларнинг ота-оналарига нисбатан Маъмурий жавобгарлик тўғрисидаги кодекснинг 47-моддаси асосида маъмурий баённома расмийлаштирилди.

 

Шунингдек, болаларни урган аёлга нисбатан кодекснинг 52-моддаси (енгил тан жароҳати етказиш) бўйича ҳам маъмурий баённома тузилиб, иш қонуний қарор қабул қилиш учун суд органларига юборилди.