Ҳормуз бўғозида АҚШ ҳарбий кемалари ҳаракати кузатилди

АҚШ ҳарбий-денгиз кучларига тегишли бир нечта кемалар Ҳормуз бўғози орқали ҳаракатланган. Бу ҳақда Axios АҚШнинг юқори лавозимли амалдорига таяниб хабар берди.

 

Маълум қилинишича, бу ҳолат минтақадаги можаро бошланганидан буён АҚШ ҳарбий кемаларининг илк бор бўғозни кесиб ўтиши ҳисобланади. Қайд этилишича, ушбу ҳаракат Эрон томони билан олдиндан мувофиқлаштирилмаган.

 

Fars ахборот агентлиги маълумотига кўра, АҚШга тегишли эсминец Фужайра портидан йўлга чиқиб, Ҳормуз бўғози томон ҳаракатланган. Агентлик ушбу вазиятни аввалроқ Эрон томони томонидан эҳтимолий сулҳ бузилиши сифатида баҳоланган ҳолатлар билан боғлаган.

 

Шунингдек, Эрон томони кеманинг ҳаракати кузатувга олинганини ва бу ҳақда музокараларда иштирок этаётган делегацияга маълумот берилганини билдирган. Айрим хабарларга кўра, агар ҳарбий кема ҳаракатни давом эттирганида, у қисқа вақт ичида нишонга олиниши мумкинлиги ҳақида огоҳлантириш берилган.

 

Кейинчалик Эрон томони огоҳлантиришларидан сўнг кема ҳаракатини тўхтатгани ҳақида маълумотлар тарқалган.

 

Бундан ташқари, айрим манбаларда АҚШ ҳарбий кемалари, жумладан «Frank E. Petersen» ва «Michael Murphy» каби кемалар бўғоз орқали Форс кўрфазига киргани, асосий мақсад эса денгиз миналарини зарарсизлантириш ва муҳим энергетик йўлакни тиклаш экани қайд этилган.