“Артистларнинг кийиниши тартибга солинади” — Маданият вазирлиги
“Бугун бизни ҳам қийнайди санъаткорларнинг ижтимоий тармоқлардаги чиқишлари, очиқ-сочиқ кийинишлари. Агар қонунчиликда бу борада чора кўриш бўйича меъёрий ҳужжат қабул қилинса, вазирлик ҳам маданият вакилларига ўз ўрнида чора кўриб боради”, - деди журналистлар билан бўлиб ўтган матбуот анжуманида вазирлик масъули.
Маданият вазирлиги сўнгги вақтларда ижтимоий тармоқларда санъат соҳаси вакилларининг ҳаддан ортиқ очиқ-сочиқ кишиниши-ю, беҳаё чиқишларига бефарқ эмас ва ҳатто қарши. Бу ҳақда вазирлик томонидан ОАВ вакиллари учун ўтказилган матбуот анжуманида маълум қилинди, дея хабар қилмоқда zamon.uz журналисти.
“Сизларни ўйлантираётган савол бизни ҳам қийнайди. Ёшларнинг келажаги санъаткорларнинг юриш-туришига боғлиқ. Чунки уларнинг ҳар биттасининг мухлислари бор, айримлариники миллионлаб. Биз ҳам шунақа видеолар чиққанда кўрамиз, изоҳларни ўқиймиз, 99 фоиз одам қарши эканини кўрамиз, шу қарши фикрлар бизни қувонтиради. 10 йиллар аввал санъаткорлар бу масалада қаттиқроқ ушланар эди. Ҳозир эркинлик, барча соҳада демократия. Афсуски бундан кўпчилик тўғри фойдаланмайди. Бироқ бу нарса яқин вақтда тартибга тушади”, — деди Маданият вазири ўринбосари Муроджон Мажидов.
Шунингдек мазкур масалада вазирлик матбуот котиби Сирожиддин Ўсаров бир пайтлар миллионлаб томошабинлар мухлислик қилган айрим санъат вакиллари бугунга келиб ижтимоий тармоқларда беҳаё чиқиш қилиб, барчанинг нафратига учраётгани ҳақида гапирди. Унга кўра, Маданият вазирлиги эркин ижодкорларнинг юриш-туриши, очиқ-сочиқ кийиниши ва ижтимоий тармоқлардаги ўринсиз чиқишларини назорат қила олмайди.
“Вазир Озодбек Назарбеков шунақа битта-иккита одамнинг номақбул ҳаракати деб бутун Маданият вазирлиги томонидан қилинаётган ислоҳотлар ёпилиб кетяпти, дейдилар. Ўша артистлар ҳам қачонлардир сизнинг ҳам бизнинг ҳам кумеримиз эди. Бугун уларнинг чиқишларини кўриб, нега Маданият вазирлиги қарамаяпти, чора кўрмаяпти дейишади. Улар бир пайтлар вазирлик тизимида фаолият юритар эди. Бироқ ҳозирда эркин ижодкор. Тармоқларда саҳифларини юритадиган блогер.
Қайси блогерга кийимига қараб, чора кўрилди? Яқинда вазир Озодбек Назарбеков Парламентда “Маданиятнинг чегараси қаерда” деган ўринли савол қўйди. Муҳим савол. Агар ростдан ҳам чегараси белгиланиб берилиб, санъаткорларнинг чиқишлари ва кийинишлари борасида аниқ тартиб қўйилиб, жазолаш бўйича меъёрий ҳужжат билан қонунийлаштирилса, вазирлик ҳам албатта чора кўради”, - деди вазир маслаҳатчиси Ўсаров.
