Исроил вазири Ал-Ақсо масжиди ҳудудида ибодат қилди

Исроилнинг миллий хавфсизлик вазири Итамар Бен-Гвир Қуддусдаги Ал-Ақсо масжиди мажмуасига ташриф буюрди. Мазкур ташрифни Иордания ва Фаластин кескин танқид қилди. Бу ҳақда Reuters хабар бермоқда.

 

Маълумки, Қуддуснинг Эски шаҳрида жойлашган мазкур ҳудуд Яқин Шарқдаги энг нозик нуқталардан бири ҳисобланади. Яҳудийлар учун Маъбад тоғи сифатида муқаддас бўлган ушбу маскан, мусулмонлар учун ҳам исломдаги учинчи муқаддас қадамжо саналади.

 

Амалдаги тартибга кўра, мажмуа Иорданияга қарашли вақф томонидан бошқарилади. Яҳудийларга ташриф буюришга рухсат берилган бўлса-да, у ерда ибодат қилиш тақиқланган. Мутахассислар қайд этишича, ушбу тартибни ўзгартиришга уринишлар аввал ҳам кескин норозилик ва зўравонликларга олиб келган.

 

Қайд этилишича, ташриф чоғида Итамар Бен-Гвир ўзини “бу ернинг эгасидек ҳис қилаётганини” айтиб, яҳудийларнинг ибодати учун кенгроқ имкониятлар яратиш тарафдори эканини билдирди. У, шунингдек, бош вазир Бенжамин Нетаняҳуни бу борада янада қатъий чоралар кўришга чақирди.

 

Иордания ташқи ишлар вазирлиги ушбу ташрифни статус-кво келишувининг бузилиши ва муқаддас жойга нисбатан ҳурматсизлик сифатида баҳолади. Фаластин президенти Маҳмуд Аббос маъмурияти эса бу каби ҳаракатлар минтақадаги вазиятни янада беқарорлаштириши мумкинлигини таъкидлади.

 

Бен-Гвирнинг матбуот котиби вазир яҳудийлар учун кириш ва ибодат қилиш имкониятларини кенгайтиришга интилаётганини маълум қилди. Унинг сўзларига кўра, вазир ташриф давомида ибодат ҳам қилган.

 

Reuters айни пайтда Бенжамин Нетаняҳу девонидан ушбу ташриф юзасидан расмий изоҳ берилмаганини ёзмоқда. Аввалги шунга ўхшаш ҳолатларда эса Исроил ҳукумати статус-кво сақланишини таъкидлаб келган.

 

Аввалроқ Эрон билан уруш даврида Ал-Ақсо масжиди мажмуаси жамоатчилик учун вақтинча ёпилгани ҳақида хабар берилганди. Яқинда масжид ҳудуди очилиб, мажмуада 3000 дан ортиқ фаластинлик намоз ўқиган эди.