Одам савдосининг ярмидан кўпини жинсий эксплуатация ташкил этaди — ИИВ

2025 йилда Ўзбекистонда одам савдоси билан боғлиқ 177 та ҳолат кузатилган бўлиб, унинг 92 таси шаҳвоний эксплуатацияни ташкил этган. Бу ҳақда 11 апрель куни ўтказилган матбуот анжуманида ИИВ Тезкор қидирув департаменти бош мутахассиси Одилбек Ўринов маълум қилди, дея хабар бермоқда Gazeta.uz

 

Вазирлик вакилининг таъкидлашича, ҳозирги кунда одам савдосининг асосий турлари сифатида шаҳвоний эксплуатация, меҳнат эксплуатацияси ва чақалоқ савдоси долзарб ҳисобланади. 

 

Шу билан бирга, аҳоли ўртасида олиб борилаётган тарғибот ишлари ҳамда фуқароларнинг ҳуқуқий онги ошиши натижасида чақалоқ савдоси ва мажбурий меҳнат билан боғлиқ ҳолатлар маълум даражада камайган.

 

Шунга қарамасдан, шаҳвоний эксплуатация билан боғлиқ жиноятлар ҳануз одам савдосининг асосий қисмини ташкил этмоқда. Қайд этилишича, 2025 йил давомида ички ишлар органлари ходимлари томонидан 72 нафар хотин-қиз аэропортларда тўхтатиб қолинган. Бу орқали уларнинг жинсий эксплуатация қурбонига айланишининг олди олинган.

 

Вазирлик вакилига кўра, мазкур турдаги жиноятларнинг келиб чиқиш сабаблари ҳам таҳлил қилинган. Жумладан, ижтимоий тармоқларда ярим-яланғоч контент тарқатилиши, оммавий маданият таъсири ҳамда тез ва осон даромад топиш ғоясининг тарғиб қилиниши ёшларни, айниқса қизларни хавфли йўлларга бошламоқда. Натижада улар алдовга учраб, енгил даромад излаб хорижга чиқиб кетиш ҳолатлари кузатилмоқда.

 

Шунингдек, 2026 йилнинг январь–март ойлари давомида ҳам одам савдоси билан боғлиқ 57 та ҳолат аниқлангани маълум қилинди.

 

Ўзбекистонда одам савдоси жиноятини қалбаки ҳужжатлардан фойдаланган ҳолда содир этганлик учун жазо муддати 5 йилдан 10 йилгача озодликдан маҳрум қилишни ташкил этади. Агар жиноят жабрланувчининг ўлимига сабаб бўлса, айбдор шахс 10 йилдан 15 йилгача озодликдан маҳрум қилиниши мумкин.