Тошкентдаги мусиқа ва санъат мактабига Фаррух Зокиров номи берилади
Мактабда “Ялла” номидаги болалар ансамбли ташкил этилади.
Шавкат Мирзиёев томонидан Фаррух Зокиров ижодини кенг тарғиб қилиш ва унинг меросини ёш авлодга етказишга қаратилган фармон имзоланди. Бу ҳақда Адлия вазирлиги хабар берди.
Мазкур қарорга мувофиқ, Тошкент шаҳрининг Яшнобод туманида жойлашган 7-сон болалар мусиқа ва санъат мактабига Фаррух Зокиров номи берилади.
Қарорга кўра, мазкур таълим муассасасида «Ялла» номидаги болалар ансамбли фаолияти йўлга қўйилади. Шунингдек, ёшлар ижодий лабораторияси ташкил этилиб, «устоз-шогирд» анъаналари асосида эстрада йўналишида ижрочилик маҳорат мактаблари фаолияти йўлга қўйилади.
Маҳорат мактабларида фаолият юритувчи устоз-ижодкорлар давлат буджети ҳисобидан ҳар ойда қўшимча рағбатлантириб борилади.
Бундан ташқари, 2026/2027 ўқув йилидан Қорақалпоғистон Республикаси, вилоятлар ва Тошкент шаҳридан 3 нафардан болалар мусиқа ва санъат мактабининг иқтидорли ўқувчиларидан иборат гуруҳ шакллантирилиб борилади ҳамда таътил даврида ёзги тўгаракка жалб этилиб, эстрада хонандалиги бўйича махсус бепул курсларда ўқитилади.
Шу билан бирга, мактабда замонавий овоз ёзиш ва тасвирга олиш студияси ташкил этилиши, ўқувчиларнинг ижодий ишлари телевидение ҳамда халқаро онлайн платформаларда намойиш этилиши режалаштирилган.
