Педагоглар учун давлат хизматларида 50 фоизлик имтиёз жорий этилди

 

Вазирлар Маҳкамасининг 2026 йил 16 апрелдаги 175-сон қарорига мувофиқ Ҳукуматнинг айрим қарорларига ўзгартириш ва қўшимчалар киритилди. Бу ҳақда Адлия вазирлиги хабар берди.

 

Унга кўра, таълим ташкилотларида меҳнат шартномаси асосида педагогик фаолият олиб бораётган ходимлар учун бир қатор давлат хизматларидан фойдаланишда имтиёзлар жорий этилди. Хусусан, педагоглар учун қуйидаги давлат хизматлари бўйича тўлов миқдори хизматларнинг умумий қийматининг 50 фоизи миқдорида белгиланди:

 

— кўчмас мулк объектларининг давлат кадастри билан боғлиқ хизматлар;

— муҳандислик-коммуникация тармоқларига уланиш хизматлари;

— умумтаълим фанлари бўйича билим даражасини аниқлаш ва сертификат бериш хизматлари;

— тракторчи-машинист гувоҳномасини олиш учун имтиҳонга рухсат бериш хизматлари;

— расмий ҳужжатларга апостил қўйиш хизматлари ҳамда бошқа давлат хизматлари.

 

Шунингдек, қарорга кўра, ихтисослаштирилган мактаблар ва мактаб-интернатлар раҳбарлари — директор ва директор ўринбосарлари ҳар 5 йилда бир маротаба малака ошириш мақсадида Маданият вазирлиги томонидан ташкил этиладиган менежерлик ўқув курсларида иштирок этиши белгиланди.

 

Бундан ташқари, ихтисослаштирилган таълим муассасаларида ўқувчиларни ўқишдан четлаштириш, бошқа йўналишга ўтказиш ҳамда ўқишни кўчириш тартиб-таомиллари ҳам аниқ белгилаб берилди.