Ўзбекистонлик 82 нафар зиёратчи Туркиядаги аэропортда қолиб кетди
Бунга туристик фирмалар ўз мажбуриятларини етарли даражада бажармагани сабаб бўлган.
2026 йил 18 апрель куни Саудия Арабистонидан Туркия орқали Ўзбекистонга қайтаётган 82 нафар фуқаронинг Сабиҳа Гёкчен халқаро аэропортида мураккаб вазиятга тушиб қолди. Бу ҳақда Ўзбекистоннинг Истанбулдаги бош консулхонаси хабар берди.
Маълум бўлишича, улар "Ihlos Travel” ва “Hikmat Travel” номли хусусий туристик фирмалар хизматларидан фойдаланган ҳолда “Ар-Риёд - Истанбул - Чимкент-Тошкент” йўналиши орқали умра зиёратини амалга оширишни режалаштирганлар.
Бироқ, томонлар ўзларига юклатилган мажбуриятларни лозим даражада бажармаганлиги оқибатида зиёратчилар чет элда қийин ҳаётий вазиятга тушиб қолган.
Шунингдек, ҳолат бўйича тегишли идоралар масъуллари билан масалани ҳал қилишга қаратилган музокаралар олиб борилган, юқоридаги фирмалар мутасадди ходимлари билан суҳбатлашилган.
Натижада фуқароларнинг вақтинча транзит ҳудудида бўлиши давомида озиқ-овқат, транспорт ва бошқа зарурий товар ҳамда хизматлар билан таъминланишига эришилган. Зиёратчиларни келишилган йўналиш бўйича хавфсиз равишда Ўзбекистонга қайтариш ишлари тўлиқ назорат остида амалга оширилган.
