Саида Мирзиёева БМТнинг Наркотиклар ва жиноятчилик бўйича бошқармаси вакили билан учрашди
Бо Матиасен билан наркотаҳдидлар, уюшган жиноятчилик, кибержиноятчилик ҳамда коррупцияга қарши курашиш йўналишларида ҳамкорлик масаласи муҳокама қилинди.
Президент администрацияси раҳбари Самарқанддаги халқаро форум доирасида БМТнинг Наркотиклар ва жиноятчилик бўйича бошқармаси ижрочи директори ўринбосари Бо Матиасен билан учрашув ўтказди.
Маълум қилинишича, мулоқот чоғида наркотаҳдидлар, уюшган жиноятчилик, кибержиноятчилик ҳамда коррупцияга қарши курашиш йўналишларида ҳамкорликни кенгайтириш истиқболлари кўриб чиқилди.
Шунингдек, Самарқанд форумини доимий фаолият юритувчи мулоқот майдонига айлантириш масалалари муҳокама қилинди.
Ўзбекистоннинг БМТ Жиноятчиликнинг олдини олиш ва жиноий одил судлов комиссиясига сайланиши амалий алоқаларни кенгайтириш учун янги имкониятлар очишига ишонч билдирилди.
