Сурхондарёда ўринбосаридан 2 миллион сўм пора олган мактаб директори 4 йилга қамалди

Сурхондарё вилояти Термиз туманида мактаб директори пора олганликда айбдор деб топилиб, 4 йилга озодликдан маҳрум қилинди.

 

Суд ҳужжатларига кўра, 1987 йилда туғилган шахс 2025 йил октябрь ойидан бошлаб туман умумтаълим мактабларидан бирида директор лавозимида ишлаб келган. 2025 йил декабрь ойида мазкур мактабда маънавий-маърифий ишлар бўйича директор ўринбосари сифатида 0,5 ставкада ишлаган Б.Х. штат қисқариши сабабли ундан ёрдам сўраб мурожаат қилган.

 

Аниқланишича, директор меҳнат қонунчилигига зид равишда, аризачига аёл киши бўлгани учун мактаб маслаҳатчиси лавозимига ишга ололмаслигини билдирган ҳамда бунинг ўрнига мусиқа фанидан дарс соатлари ажратиш ёки психолог лавозимига жойлашишни таклиф қилган. 

 

Шу билан бирга, у мактаб иситиш тизимини яхшилаш учун шахсий маблағ сарфлаётганини айтиб, иш билан таъминлаш эвазига 2 миллион сўмни “ёрдам пули” сифатида талаб қилган.

 

2026 йил 8 январь куни директор мактаб яқинида Б.Х.дан 1 миллион сўм нақд пул ва унинг банк пластик картасини олган. Кейинчалик банкомат орқали картадаги яна 1 миллион сўм маблағни нақдлаштириб олган.

 

Маълум қилинишича, орадан вақт ўтиб, иш масаласи ҳал этилмагач, жабрланувчи пулни қайтаришни талаб қилган. Иқтисодий жиноятларга қарши кураш департаменти ходимлари томонидан олиб борилган суриштирув давомида директор пулларни қайтариб берган.

 

Жиноят ишлари бўйича Термиз туман суди томонидан Й.Д. Жиноят кодексининг 210-моддаси (пора олиш) билан айбдор деб топилди. Суд ҳукмига кўра, унга 2 йил муддатга мансабдорлик лавозимларида ишлаш ҳуқуқидан маҳрум этиш ҳамда 4 йил муддатга озодликдан маҳрум қилиш жазоси тайинланди.