Тошкентда ҳайдовчи ўқувчини уриб, қочиб кетди

Тошкентда Damas ҳайдовчиси мактаб ўқувчисини уриб юбориб, воқеа жойидан қочиб кетди. Бу ҳақда Тошкент шаҳар ИИББ ЙҲХБ ахборот хизмати бошлиғи Қаҳрамон Худойберганов хабар берди.

 

Маълум қилинишича, ЙТҲ 20 апрель куни Олмазор туманидаги Келес йўли кўчасида содир бўлган. Тарқалган видеода икки нафар бола пиёдалар ўтиш жойи яқинидан йўлни кесиб ўтаётгани, шу пайтда улардан бирини автомобиль уриб кетгани ва ўқувчи йиқилгани акс этган.

 

Тошкент шаҳар ИИББ ходимлари ҳайдовчининг шахсини аниқлаб, у 19 ёшли йигит эканини билдирди. Ҳайдовчининг айтишича, у болаларни пайқагач сигнал чалган, улардан бири тўхтаган, бироқ орқадаги бола чалғиб қолган ва йўлга югуриб чиққан.

 

У болани уриб юбормасликка ҳаракат қилгани, бироқ буни уддалай олмаганини айтган. Ҳайдовчига кўра, у болани уриб юборгандан сўнг у саросимага тушиб, шок ҳолатида ҳаракатни давом эттирган. Кейинроқ тўхтаб ўзига келган ва қайтишга қарор қилган, бироқ бу вақтда жабрланувчини тез ёрдам машинаси олиб кетган. Йўлда у тез ёрдам машинасидан орта қолиб кетган.

 

Шундан сўнг ҳайдовчи Келесдаги ҳуқуқ-тартибот органларига бориб, воқеа ҳақида хабар берган.

 

Ҳозирда ушбу  ҳодиса бўйича Маъмурий жавобгарлик тўғрисидаги кодексининг 133-моддаси (транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши) ва 137-моддаси (йўл-транспорт ҳодисаси юз берган жойдан кетиб қолиш) бўйича баённомалар расмийлаштирилган.

 

Матбуот хизматининг таъкидлашича, агар пиёданинг жароҳатлари енгил бўлса, иш маъмурий тартибда кўриб чиқилади. Агар жароҳат жиддий бўлса, жиноий иш қўзғатилади.

 

Воқеага гувоҳ бўлганлар, ўқувчи бошидан жароҳат олганини айтмоқда.