Наманганда 85 млрд сўмлик айланмага эга ноқонуний қимор тармоғи фош этилди
Гумонланувчилардан қиймати 400 миллион сўмга яқин пул маблағи, пластик карталар, мобил телефонлар, компьютер техникалари ашёвий далил сифатида олинган.
Наманган вилоятининг Давлатобод туманидаги компьютер ўйин клубида онлайн қимор ўйинлари ташкил этиб келган жиноий гуруҳ фаолиятига чек қўйилди. Бу ҳақда вилоят ИИБ хабар берди.
Маълум қилинишича, Наманган вилояти ИИБ ахборот технологиялари соҳасидаги жиноятларга қарши курашиш бошқармаси томонидан ўтказилган тезкор тадбирда ўйин клубида яширин қимор схемаси аниқланган. Шартли харидор орқали 620 минг сўм маблағ киритилиб, ушбу пул қимор платформаси аккаунтига ўтказилганидан сўнг жиноий гуруҳ аъзолари ушланган.
Терговга қадар текширувга кўра, Чуст тумани “Гулистон” маҳалласида яшовчи 1985 йилда туғилган шахс ишончли шериклари билан бирга махсус жиноий гуруҳ ташкил қилган.
Гуруҳ фаолияти давомида махсус иловадаги ҳисобларда 796,6 миллион сўм лимит маблағи ва 44,6 миллиард сўмлик транзаксия, бошқа бир ҳисобда эса 115,6 миллион сўм лимит ва 26,6 миллиард сўмлик айланма қайд этилган. Шунингдек, криптовалюта орқали 14,6 миллиард сўмлик пул айланмаси амалга оширилгани аниқланган.
Умумий ҳисобда жиноий фаолият айланмаси 85 миллиард сўмни ташкил этган. Тезкор тадбир давомида гумонланувчилардан 26 990 АҚШ доллари, 73 миллион сўм нақд пул, 10 та пластик карта, мобил телефонлар, компьютер техникалари ҳамда пул санаш ускунаси ашёвий далил сифатида олинган.
Ҳолат юзасидан Ўзбекистон Жиноят кодексининг 278-моддаси 2-қисми “б” банди билан жиноят иши қўзғатилган, гумонланувчиларга нисбатан қамоққа олиш эҳтиёт чораси қўлланган. Тергов ҳаракатлари давом этмоқда.
