Самарқандда вояга етмаган икки қизга нисбатан зўравонлик содир этилди
Васий аёл болаларнинг хорижда бўлиб турган онасидан пул ундириш мақсадида уларга босим ўтказиб, зўравонлик ҳолатини видеога олган.
Ижтимоий тармоқларда вояга етмаган икки нафар қизга нисбатан зўравонлик содир этилгани акс этган видеотасвирлар юзасидан ҳолат Болалар омбудсмани томонидан назоратга олинди.
Аниқланишича, жорий йилнинг 21 апрель куни Самарқанд вилояти Тойлоқ туманида фуқаро M.С. вақтинча васийлигида бўлган икки нафар вояга етмаган (2017 ва 2019 йилда туғилган) қизга нисбатан жисмоний ва руҳий тазйиқ ўтказган. Дастлабки маълумотларга кўра, у хорижда бўлиб турган болаларнинг онасидан пул ундириш мақсадида босим ўтказиб, зўравонлик ҳолатини видеога олган.
Мазкур ҳолат юзасидан Болалар омбудсманининг Самарқанд вилоятидаги минтақавий вакили воқеа жойига чиқиб, вазиятни ўрганган ҳамда болаларни ҳимоя қилиш бўйича зарур тезкор чораларни кўрган.
Ҳозирда туман ички ишлар органлари томонидан терговга қадар текширув ҳаракатлари олиб борилмоқда. Шунингдек, туман васийлик органи — «Инсон» маркази масъуллари томонидан M.С. васийлик вазифасидан четлатилган.
Болаларга етказилган тан жароҳатлари даражасини аниқлаш мақсадида суд-тиббиёт экспертизаси тайинланган. Уларнинг руҳий ҳолатини тиклаш ва психологик барқарорлигини таъминлаш учун мутахассис-психолог жалб этилган.
Шунингдек, вояга етмаган қизлар тумандаги оилавий болалар уйига жойлаштирилиб, яшаш ҳудудига яқин мактаб ҳамда мактабгача таълим муассасасига расмийлаштирилган. Шу тариқа болаларнинг хавфсиз муҳитда яшаш ва таълим олиш ҳуқуқлари таъминланган.
